MUMALU nganyaki ŵanthu wo alembanga Bayibolu akulemba mazu nganyaki mwakuwerezawereza. Tiyeni tiwoni vifukwa vitatu vo vitenere kuti vinguchitiska wo alembanga Bayibolu kuchita venivi.

Nyengu yo Bayibolu lalembekiyanga. Mu nyengu ya Ayisirayeli, ŵanthu anandi ŵengavi buku lawu ndi lawu la Dangu. Kanandi yiwu avwanga Dangu lichiŵerengeka asani awungana pamoza kuchihema chakukumanaku. (Doto. 31:​10-12) Tikayika cha kuti yiwu atimbanyizgikanga asani avwisiya chifukwa gulu losi la ŵanthu lamanga wima kwanyengu yitali. (Nehe. 8:​2, 3, 7) Pa nyengu yeniyi, kuwereza fundu zakukhumbika kwawovyanga kuti ŵanthu akumbukengi malemba kweniso kuti angagwiriskiyengi ntchitu. Kuwereza mazu nganyaki kwaŵawovyanga kukumbuka vinthu vakukhumbika ukongwa nge marangu ngaku Chiuta ndi vyeruzgu vaki.—Levi. 18:​4-22; Doto. 5:1.

Kalemberu kaki. Vigaŵa vinyaki va Bayibolu nge buku la Masalimo, Sumu Yaku Solomoni kweniso Chitenje vikulembeka nge sumu. Nyengu zinyaki mazu nganyaki ngawerezekangawerezekanga mu sumu. Venivi vadidimizganga fundu yikulu ya sumu yo ndipu vawovyanga kuti ŵanthu ayiloŵezengi. Mwakuyeruzgiyapu, wonani mazu ngo ngasanirika pa Salimo 115:​9-11 ngakuti: “Yiwi Isirayeli, gomezga Yehova—Iyu ndiyu watikuwovyani, kweniso ntchishangu chinu. Yiwi nyumba yaku Aroni, gomezga Yehova—Iyu ndiyu watikuwovyani, kweniso ntchishangu chinu. Yimwi mutopa Yehova, gomezgani Yehova—Iyu ndiyu watikuwovyani, kweniso ntchishangu chinu.” Kuwereza mazu ngenanga kwawovyanga wo ambanga kuti akumbukengi fundu zakuzirwa zenizi.

Kudidimizga fundu zakukhumbika ukongwa. Nyengu zinyaki ŵanthu wo alembanga Bayibolu awerezanga fundu zakukhumbika ukongwa. Mwakuyeruzgiyapu, Yehova wati wakambiya Ayisirayeli kuti angaryanga ndopa cha, Mozesi wangukamba vifukwa vaki mwakuwerezawereza. Chiuta wakhumbanga kudidimizga kuti umoyu wa chinthu chechosi we mundopa, kung’anamuwa kuti ndopa zimiya umoyu. (Levi. 17:​11, 14) Pati pajumpha nyengu, pa nyengu yo akutumika ndi ŵara ku Yerusalemu alembanga vinthu vo Akhristu akhumbika kuvikhwecha kuti akondwesi Chiuta, angudidimizga so kukhumbika kwakukana ndopa.—Machi. 15:​20, 29.

Chinanga kuti Bayibolu liwerezawereza mazu nganyaki, venivi ving’anamuwa cha kuti Yehova wakhumba kuti tijengi ndi chiziŵilizga chakuwerezawereza mazu nga mu Bayibolu. Mwakuyeruzgiyapu, Yesu wangukamba kuti: “Pakupemphera ungawerezangawerezanga ŵaka cha.” (Mate. 6:7) Pavuli paki, wanguzumbuwa vinthu vo tingakamba mumapempheru ngidu mwakukoliyana ndi khumbu laku Chiuta. (Mate. 6:​9-13) Mwaviyo, chinanga kuti tiwerezawereza cha mazu pakupemphera, kweni tingapemphere nkhani zinyaki mwakuwerezawereza.—Mate. 7:​7-11.

Pa vifukwa vakuvwika, mazu nganyaki ngakuwerezekawerezeka mu Bayibolu. Yeniyi njimoza mwa nthowa zinandi zo Msambizi widu Mura watitisambiziya kuti vinthu vitiyendiyengi umampha.—Yesa. 48:​17, 18.