VALOVI nya Bhibhiliya va di gu phindra-phindra malito nyo khaguri. Hongoleni hi wona sighelo siraru si nga gira valovi va gira isoso:

Tepo yi nga lowa khiyo. Israyeli wa gale, vathu nya vangi va diri mwalo dzikopiya nya Nayo. Avo va di gupwa Nayo tepo va nga ba va tshangana gumogo omu nya tabhernakeli. (Dhet. 31:10-12) Adzina saye, si di gu va garadzeya gu vega gwadi gupima nigu va di gu dzega dziora nya dzingi na va emide vbakari nya gitshungu nya gikhongolo. (Neh. 8:2, 3, 7) Ga siemo nya nga esi, gu phindra-phindra malito nya lisima si di hadzi gu vbevbugeya vathu gu dundruga milowo va bwe va yi thumisa. Nigu gambe si di hadzi gu phasa, ngudzu-ngudzu gu dundruga mahungu nyo khaguri ma ganeyago khu milayo ya Jehovha a va ningidego. — Levhi 18:4-22; Dhet. 5:1.

Edzi yi nga lowa khidzo. Simbe sipandre nya Bhibhiliya si lovidwe kha nga dzindzimo, khu giyeyedzo: Ndzimo, Gizimba gya Solomoni ni Gililo. Dzimbe dzitepo, dzindzimo dzodzo dzi na ni malito ma nga phindrwa-phindrwa. Ayo ma gu tshingisa hungo nya mahungu nya Ndzimo ni gu phasa ava va engiseyago gu vegisa malito hungoni. Khu giyeyedzo, wona malito ma gomogo ga Ndzimo 115:9-11 ma gu khayo: “Enu va na Israyeli tumbani Pfhumu Nungungulu; kholu uye khuye muphasedzeli ni gitshangu gyanu. Enu va nyumbani ga Aroni, tumbani Pfhumu Nungungulu; kholu uye khuye muphasedzeli ni gitshangu gyanu. Enu mu khodwago ga Pfhumu, tumbani Nungungulu! Kholu uye khuye muphasedzeli ni gitshangu gyanu.” Ina u si wonide gu khuwe gu phindra-phindra malito si di hadzi phasa ava va engiseyago gu vegisa lisine mapimoni ni monyoni gwawe?

Gasi gu tshingisa mahungu nya lisima. Dzimbe dzitepo, valovi nya Bhibhiliya va di gu phindra-phindra malito nya lisima. Khu giyeyedzo, tepo Jehovha a nga ninga gileletelo Vaisrayeli nya gu mba hodza novba, uye a di embeya Mosi gasi gu phindra-phindra sighelo sakone dzitepo nya dzingi. Nungungulu a di gu vbweta gu tshingisa gu khuye guvbanya nya mili gomo novbani mwendro novba wa gu emeya womi. (Levhi 17:11, 14) Khu gu gimbiya nya tepo, vapostoli ni madhota ya Jerusalema tepo ma nga gira sasamedzo nya silo va nga ba va yede gu si potsa gasi va si zangarisi Jehovha, va tshingiside gambe lisima nya gu mba hodza novba. — Mith. 15:20, 29.

Jehovha kha nga ba a vbweta gu khuye malito ma nga phindrwa-phindrwa omu nya Bhibhiliya ma khala giolovedzo. Khu giyeyedzo, Jesu a di khuye: “Wa gu ba u gombeya, u nga phindra-phindri malito ya mamowo.” (Mat. 6:7) Uye a hi ningide mawonelo nya edzi hi yedego gu gira khidzo nombelo ma gimbileyanago ni gugola gwaye. (Mat. 6:9-13) Khu kharato, ambari ha gu ba hi zama gu mba phindra-phindra malito omu nya milombelo yathu, hi tshulegide gu phindra mahungu ya mamowo. — Mat. 7:7-11.

Lito la Nungungulu li ngu phindra-phindra malito khu gighelo nyo pwale. Mweyo nya dzindziya Muhevbudzi wathu nya Khongolo a yi thumisago gasi gu hi hevbudza silo si hi phasago. — Isa. 48:17, 18.