BALEMBI ba Bbaibbele zimwi ziindi bakali kwaayinduluka majwi ngoonya bbala abbala. Amubone twaambo totatwe tulangilwa kuti ntotwakabapa kucita boobo:

Ciindi nocakalembwa. Mu Israyeli yansiku, bantu banji tiibakajisi makkopi aa Mulawo aabageme. Bunji bwaziindi, Mulawo bakali kuumvwa buyo nowakali kubalwa baswaangana antoomwe kutente lyakubunganina akutempele. (Dt. 31:​10-12) Pele kweelede kuti kwakali kuba zintu zimwi izyakali kubanyonganya ciindi nobakali kuswiilila kabaimvwi kwamawoola aali mbwaabede munkamu yabantu. (Neh. 8:​2, 3, 7) Aboobo muziindi zili boobu, kutwiinduluka twaambo tuyandika kapati kwakali kukonzya kugwasya bantu kwaayeeya magwalo alimwi akwaabelesya. Kwiinduluka mabala aamwi kwakali kukonzya kubagwasya kuyeeya makani aayandika kapati, mbuli milawo njaakabapede Jehova.—Lev. 18:​4-22; Dt. 5:1.

Mbocakalembwa. Zibeela zimwi zyamu Bbaibbele zyakalembwa kazili nyimbo, mbuli bbuku lya Intembauzyo, Lwiimbo lwa Solomoni alimwi a Malilo. Zimwi ziindi, nyimbo zyakalijisi majwi aakaindulukwa, ikukankaizya mutwe wamakani walwiimbo alimwi akugwasya baswiilizi kwaaswata mabala. Mucikozyanyo, amubone majwi aali ku Intembauzyo 115:​9-11: “Nywebo nobana Israyeli, amusyome Jehova, ngomugwasyi wanu alimwi nintobo yanu. Nywebo nobamuŋanda ya Aroni, amusyome Jehova, ngomugwasyi wanu alimwi nintobo yanu. Nywebo nomuyoowa Jehova, amusyome Jehova, ngomugwasyi wanu alimwi nintobo yanu.” Sena mwabona kwiinduluka majwi aaya mbokwakali kukonzya kugwasya baimbi kunootuyeeya twaambo ootu tuyandika kapati?

Kaambo Ncocakalembelwa. Zimwi ziindi balembi ba Bbaibbele bakali kwaayinduluka majwi aayandika kapati. Mucikozyanyo, ciindi Jehova naakalailila bana Israyeli kuti batanoolyi bulowa, wakaambila Musa kukainduluka kwaziindi zinji kaambo ncobatakeelede kubulya. Leza wakali kuyanda kukankaizya kaambo kakuti buumi bwacintu cipona buli mubulowa, icaamba kuti bulowa bwiiminina buumi. (Lev. 17:​11, 14) Mukuya kwaciindi, baapostolo abaalu bamu Jerusalemu nobakalemba kujatikizya ncobakeelede kucita Banakristo kutegwa bamukkomanisye Leza, baakakankaizya alimwi kaambo kakutantamuka bulowa.—Mil. 15:​20, 29.

Nokuba kuti Bbaibbele lilaayindulula majwi aamwi, eeci tacaambi kuti Jehova uyanda kuti tube aacilengwa cakwiinduluka mabala aamu Bbaibbele. Mucikozyanyo, Jesu wakaamba kuti: “Ciindi nomupaila, mutanikwaambi majwi ngoonya cakwiinduluka-induluka.” (Mt. 6:7) Kumane wakaamba zintu nzyotukonzya kubikkilizya mumupailo izyeendelana akuyanda kwa Leza. (Mt. 6:​9-13) Aboobo, nokuba kuti tatweelede kwaamba majwi ngoonya cakwiinduluka-induluka mumupailo, tulakonzya kupaila kujatikizya kaambo kamwi cakwiinduluka-induluka.—Mt. 7:​7-11.

Aboobo kuli twaambo tubotu Jwi lya Leza ncoliinduluka kwaamba mabala aamwi alimwi amajwi. Ninzila imwi Mwiiyi wesu Mupati njabelesya kutuyiisya kutegwa tugwasyigwe.—Is. 48:​17, 18.