BALEMBI baBbayibbili chimwi chiindi bakali kwiindulula aamwi majwi kumakani ngibakali kulemba. Atubone zimwi zyakali kupa kuti bachite oobo.

Chiindi naakalembwa makani aayo. Muchisi cha-Israyeli, bantu biingi teebakalikwe makkopi aamabbuku aaMulawu pe. Bakali kuswiilila kupela chiindi Mulawu nwaakali kubalilwa chisi choonse nibakali kubungana kutente lyakukombela. (Dt. 31:​10-12) Kulakonzeka kuti kwakali zintu zyakali kubapambanisya zyakali kubakachizya kuti baswiilisisye alubo bakali kwiimikila kwachiindi chilamfu loko kabali nkamu. (Neh. 8:​2, 3, 7) Muzyiimo zili boobu, kwiindulula aamwi majwi kwakali kukonzya kubawubila bantu kuti bayeeye magwalo akuti babelesye magwalo aayo mubuumi bwabo. Nkinkaako, kwiindulula-yindulula aamwi majwi kwakali kubagwasya kuti bayeeye nzwaakali kwaamba Mulawu Jehova ngwaakabapede.—Lev. 18:​4-22; Dt. 5:1.

Mbaakalembedwe mavesi aayo. MuBbayibbili, muli miimbo miingi loko. Muchikozyano, mubbuku lya-Intembauzyo, Lwiimbo lwa Solomoni abbuku lyaMalilo muli miimbo. Chimwi chiindi, miimbo akali aamajwi aayindulwidwe-yindulwidwe akali kusimya kaambo kapati akuti bantu baajate amutwe. Muchikozyano, bona majwi aali muli Intembauzyo 115:​9-11 atii: “Nywebo nobana Israyeli, amusyome Jehova, ngomugwasyi wanu alimwi nintobo yanu. Nywebo nobamuŋanda ya Aroni, amusyome Jehova, ngomugwasyi wanu alimwi nintobo yanu. Nywebo nomuyoowa Jehova, amusyome Jehova, ngomugwasyi wanu alimwi nintobo yanu.” Kwiindulula majwi aaya kwakali kukonzya kugwasya bayimbi kuti baabikke mumoyo majwi aakayindulwidwe-yindulwidwe.

Kwakali kusimya twaambo tuyandikana. Chimwi chiindi balembi baBbayibbili bakali kwiindulula mavesi aali aatwaambo tuyandikana. Muchikozyano, chiindi Jehova naakabuzya ma-Israyeli kuti batalyi ganzi, wakabuzya Mozesi kuti ayindulule nkani eeyo kwaziindi zyiingi. Leza wakali kuyanda kusimya kaambo kakuti bantu bazibe kuti buumi bwakali muganzi akuti ganzi lyiiminina buumi. (Lev. 17:​11, 14) Mukuya kwachiindi, baapostoli abaalu bamuJerusalema bakazilembaansi zintu nzibakeelede kutantamuka maKkristu kuti babotezye Leza alubo bakakasimya lubo kaambo kakuti batantamuke ganzi.—Mil. 15:​20, 29.

Nikuba kuti amwi mavesi alindulwidwe-yindulwidwe, eezi tazyaambi kuti Jehova uyanda kuti tube aachiimbo chakukkopa bbala abbala lili muvesi yamuBbayibbili chiindi nitukomba. Jesu wakati: “Chiindi nukomba, utanooyindululi majwi aakozyenie.” (Mt. 6:7) Kuzwa waawo, wakatubuzya zintu nzitweelede kukombela zyeendelana aakuyanda kwaLeza. (Mt. 6:​9-13) Nikuba kuti chiindi nitukomba tatwiindululi-yindululi majwi pesi tulakonzya kukombela nkani iimwi kwaziindi zyiingi katubelesya majwi aasiyene.—Mt. 7:​7-11.

Kuli twaambo tubotu loko twakapa kuti amwi mavesi aali muJwi lyaLeza ayindululwe-yindululwe. Njiimwi nzila Muyiisi wesu Mupati njatuyiisyaayo kuti tugwasigwe.—Is. 48:​17, 18.