VATSARI va Bibele a va phindhaphindha swiga swo karhi. Xiya swilo swinharhu leswi kumbexana swi endleke va endla tano:

Nkarhi lowu yi nga tsariwa ha wona. EIsrayele wa khale, vanhu vo tala a va nga ri na tona tikopi ta Nawu. Mikarhi yo tala a va twa Nawu loko wu hlayeriwa tiko loko ri hlengeletanile etabernakeleni. (Det. 31:​10-12) A swi kanakanisi leswaku a ku ri ni swilo leswi a swi va kavanyeta loko va yingiserile naswona va yime tiawara to tala va ri hi ntshungu. (Neh. 8:​2, 3, 7) Eka swiyimo swo tano, a swi ta va olovela vanhu ku tsundzuka matsalwa ni ku tlhela va ma tirhisa loko ku phindhaphindhiwa swiga swa nkoka. Ku phindhaphindha marito yo karhi a swi ta va pfuna leswaku va tsundzuka timhaka ta nkoka to fana ni milawu ya Xikwembu ni swiboho swa vuavanyisi.—Lev. 18:​4-22; Det. 5:1.

Ndlela leyi yi tsariweke hayona. Tibuku tin’wana ta Bibele ti katsa tinsimu to tanihi buku ya Tipisalema, Risimu ra Solomoni na Swirilo. Mikarhi yin’wana tinsimu a ti ri ni marito lawa a ma phindhaphindhiwa, leswi a swi kandziyisa nhlokomhaka ya risimu ni ku pfuna vayingiseri leswaku va ri tsundzuka. Hi xikombiso, xiya marito lama kumekaka eka Pisalema 115:​9-11 leyi nge: “Tshemba Yehovha, wena Israyele I mupfuni wa wena ni xitlhangu xa wena. Tshemba Yehovha, wena ndyangu wa Aroni I mupfuni wa wena ni xitlhangu xa wena. Tshembani Yehovha, n’wina lava chavaka Yehovha I mupfuni wa n’wina ni xitlhangu xa n’wina.” Ku phindhaphindha marito wolawo swi nga va swi pfune vayimbeleri leswaku va tshama va ri karhi va tsundzuka ntiyiso wa risima.

Hikwalahokayini yi tsariwile. Mikarhi yin’wana vatsari va Bibele a va phindhaphindha swiga swa nkoka. Hi xikombiso, loko Yehovha a lerisa Vaisrayele leswaku va nga dyi ngati, u byele Muxe leswaku a xi phindhaphindha ko tala xivangelo xa kona. Xikwembu a xi lava ku kandziyisa leswaku vutomi bya xiharhi byi le ngatini, ku nga leswaku ngati yi yimela vutomi. (Lev. 17:​11, 14) Hi ku famba ka nkarhi, loko vaapostola ni vakulukumba eYerusalema va xaxameta swilo leswi nga tsakisiki Xikwembu naswona swi faneleke swi papalatiwa, va tlhele va kandziyisa mhaka ya ku papalata ngati.—Mit. 15:​20, 29.

Hambileswi Bibele yi ti phindhaphindhaka, sweswo a swi vuli swona leswaku Yehovha u lava hi swi endla mukhuva ku phindhaphindha swiga swa le Bibeleni. Hi xikombiso, Yesu u te: “Loko u khongela, u nga vuli marito lama fanaka hi ku phindhaphindha.” (Mat. 6:7) Kutani u ye emahlweni a boxa swilo leswi faneleke leswi fambisanaka ni ku rhandza ka Xikwembu leswi hi nga swi boxaka eswikhongelweni swa hina. (Mat. 6:​9-13) Hambiloko hi papalata ku phindhaphindha marito lama fanaka loko hi khongela, a swi bihanga ku tlhela hi khongela hi swilo leswi hi nga tshama hi swi khongelela.—Mat. 7:​7-11.

Rito ra Xikwembu leri huhuteriweke, ri phindhaphindha marito ni swiga swo karhi hikwalaho ka xivangelo lexinene. Hi yin’wana ya tindlela letinene eka to tala leyi Muleteri wa hina Lonkulu a hi dyondzisaka hayona leswaku hi vuyeriwa.—Esa. 48:​17, 18.