NE FAKAFOKI‵FOKI sāle ne tino ne tusi ne latou te Tusi Tapu a nisi tugapati i te Tusi Tapu. Ke mafau‵fau nei ki pogai e tolu ne fai ei ne tino tusitala a te mea tenā:

Te vaitaimi telā ne tusi i ei. I Isalaelu mua, ne seki maua ne te tokoukega o tino a ‵kopi totino o te Tulafono. Ne fakalogo‵logo te tokoukega o tino ki te faitauga o te Tulafono māfai ko maopoopo a te fenua kātoa i te faleie tapu. (Teu. 31:​10-12) Kāti e isi ne mea ne mafai o fakalavelave atu ki a latou i te taimi ne fakalogo‵logo kae ‵tu ei i se fia itula i loto i te vaitino. (Nee. 8:​2, 3, 7) I vaegā taimi penā, a te fakafokifoki atu o se tugapati tāua, ne fai ei ke faigofie ki tino ke masaua a tusi fai‵tau kae ke fakagalue ne latou. A te fakafoki‵foki atu o vaegā tugapati penā, ne fesoasoani malosi atu ke masaua ne latou a fakamatalaga tāua, e pelā mo tulafono fo‵liki mo fakamasinoga a te Atua.—Levi. 18:​4-22; Teu. 5:1.

Te auala ne tusi i ei. Kāti se 10 pasene o te Tusi Tapu ko pese kolā ne ‵fatu—e aofia i ei te tusi ko Salamo, Pese a Solomona mo te Tagiga Ielemia. I nisi taimi ko fakafokifoki sāle se tugapati i pese ke faka‵mafa atu i ei a te matua o te pese kae ke fakafaigofie ki tino fakalogo‵logo ke tauloto a pati o pese. E pelā me se fakaakoakoga, onoono ki pati i te Salamo 115:​9-11: “Isalaelu, tali‵tonu ki a Ieova—A ia ko te lotou fesoasoani mo te lotou talita. Te kāiga o Alona, tali‵tonu ki a Ieova—A ia ko te lotou fesoasoani mo te lotou talita. A koutou kolā e ma‵taku ki a Ieova, tali‵tonu ki a Ieova—A ia ko te lotou fesoasoani mo te lotou talita.” A te fakafoki‵foki mai faeloa o tugapati konā ne fesoasoani atu eiloa ki te kau usuusu ke masaua a muna‵tonu tāua konā i olotou loto mo mafaufau.

Ke faka‵mafa atu ei a manatu tāua. I nisi taimi ne fakafoki‵foki mai ne tino tusitala a tugapati tāua. E pelā mo te taimi ne fakatonu atu a Ieova ki te kau Isalaelu ke se ‵kai ki toto, ne fai atu a ia ki a Mose ke fakafoki atu faeloa a te fakatonuga tenā i taimi e uke. Ne manako te Atua ke faka‵mafa atu te manatu me i te ola o mea ola katoa e maua i loto i te toto, ko tena uiga, a te toto e sui ne ia a te ola. (Levi. 17:​11, 14) Fakamuli ifo, i te taimi ne tusi atu ei ne te kau apositolo mo toeaina i Ielusalema a mea e ‵tau o fai ke ‵kalo kea‵tea mai te fakafanoanoa atu ki te Atua, ne toe faka‵mafa atu ne latou a te tāua ke faka‵mao kea‵tea mai te toto.—Galu. 15:​20, 29.

E tiga eiloa e fakafoki‵foki mai i te Tusi Tapu a nisi tugapati, e se ko tena uiga me e manako a Ieova ke fakafoki‵foki faeloa ne tatou a tugapati i te Tusi Tapu e pelā me se faifaiga masani. E pelā me se fakaakoakoga, ne fai mai a Iesu: “Kafai koe e ‵talo, sa fakafoki‵foki au pati.” (Mata. 6:7) Oti aka, fakaasi mai ei ne ia a mea kolā e mafai o ‵talo atu tatou ki ei, kolā e fetaui mo te loto o te Atua. (Mata. 6:​9-13) Tela la, e tiga eiloa e se fakafoki‵foki ne tatou a pati eiloa konā i ‵tou ‵talo, kae e mafai faeloa o fakafoki‵foki ne tatou a manatu konā i ‵tou ‵talo.—Mata. 7:​7-11.

Tela la, e isi ne pogai ‵lei e fakafoki‵foki mai ei a nisi pati mo fuaiupu i te Muna tusia a te Atua. A te mea tenei se tasi o auala e uke e akoako ei tatou ne te ‵tou toe Faiakoga Sili ke maua ne tatou mai ei a mea aoga.—Isa. 48:​17, 18.