NGUWA dzimweni, atari amweni e Bhaibheri aiphindisa masoko amwe-amwewo, soko no soko. Onai zvikonzero zvimweni zvitatu zvaiita kuti pamweni awona aite izvona:

Paakatarhwa. Ku Israeri yo kare anhu akawanda ainga asina makopia e mutemo kuti aaseenzese. Kakawanda kakhona ciitiko cimwe cekuti aikwanisa kuzwa Mutemo, ndi paya pekuti anhu aiungana pamberi pe tabhernakuro. (Dhe. 31:10-12) Pamweni pa zviitiko izvona zvainga zviri nyore maningi kuti anhu akangaidzike paainga akaima ecizwa mutemo ke nguwa yakareba ari pakati pe anhu akawanda. (Nee. 8:2, 3, 7) Ndiyo ndaa, kuti anhu akwanise kuedzurira zvaierengwa uye oseenzesa mazano awona mu upenyu wawo zvaikosha maningi kuti paphindiswe-phindiswe masoko anokosha. Kuphindisa masoko manganani zvaikosha kuitira kuti anhu akwanise kuedzurira zvakanaka mitemo imweni yaibatanidza zviro zvakawanda.—Rev. 18:4-22; Dhe. 5:1.

Akatarhwa kudini. Matii amweni e Bhaibheri akatarhwa hinga ngoma. Ngo muezaniso, mabhuku e Pisarema, Ngoma ya Soromoni, uye Mariro. Ngoma dzimweni dzino koro no masoko anophindwa uye izvona zvinosiya pamhene musoro we ngoma, zvecibetsera aya acazwa ngomeyo kuti aedzurire masoko. Ngo muezaniso, onai zvakatarhwa pana Pisarema 115:9-11: “Haiwa Aisraeri, gondai Djehovha—Ndiyena mubetseri wako uye cidziiriro cako. Haiwa nyumba ya Aroni, gondai Djehovha—Ndiyena mubetseri wako uye cidziiriro cako. Imwimwi munothya Djehovha, gondai Djehovha—Ndiyena mubetseri wako uye cidziiriro cako.” Imwimwi munokwanisa kuona kuti kuphindwa ke masoko aya kaizobetsera kudini aembi kuti akande mu ndangariro dzawo uye mu mwoyo mawo masoko anorekethwa mu ngoma?

Ngei akatarhwa. Atari e Bhaibheri kakawanda kakhona aiphinda masoko anokosha. Ngo muezaniso, Djehovha paakapasa nhungamiriro ku Aisraeri inocokuita no kutama kurhya ngazi, Djehovha akabvunza Mozesi kuti aphinde-phinde zvikonzerozvo kakawanda. Djehovha aida kuti Aisraeri aziye kuti ngazi yaimirira upenyu. (Rev. 17:11, 14) Mumasure me kacinguwa, aphostori uye no akuru e ku Djerusarema paakatara ngezve zviro zvaidikana kuita Akristu kuti apfadze Djehovha kana kuti ngezve zviro zvaaidikana kusiya kuti asamupfadze, awona akatarazve ngezve kudiikanwa ke kusiya ngazi.—Zvii. 15:20, 29.

I zvirokwazvo kuti Bhaibheri rinophinda masoko akawanda, asi izvona azvidi kureya kuti Djehovha anoda kuti tirumbwe teciphinda masoko amwe-amwewo. Ngo muezaniso, Djesu akati: “Paunonga wecinamata, usaphinde-phinde zviro zvimwezvo.” (Mat. 6:7) Iyena akabhuya zviro zvimweni zvatingabatanidza pa minamato yedu. (Mat. 6:9-13) Ndiyo ndaa, kunyazi teciedza kuti tisaphinde-phinde masoko amwe-amwewo mu minamato yedu, asi isusu tinoedza kubatanidza nyaya dzimwe-dzimwedzo mu minamato yedu.—Mat. 7:7-11.

Pano zvikonzero zvakanaka zvinoita kuti Bhaibheri riphinde-phinde masoko amwe-amwewo uye mitsara dzimwedzo. Uu ndi umwe we mishobo dzakawanda dzekuti Djehovha Mufundisi wedu Mukuru, anotifundisa zvakatinakira.—Isa. 48:17, 18.