БУРГАНДАН Библияны бижиир даалга алган улус чамдыкта сөстерни катаптаар турган. Аңаа салдарлыг болган үш чүүлдү көрээлиңер.

Үези. Бурунгу Израильге чоннуң хөй кезииниң номчуур хууда хоойлузу турбаан. Хоойлуну олар колдуунда ыдыктыг майгынның мурнунга, а сөөлүнде — өргээге келгеш, каш шак улай туруп алгаш дыңнаар турган (Ы. х. к. 31:10—12; Неем. 8:2, 3, 7). Аңаа оларны чардыктыра бээр шимээн-дааш турган чадавас. Кол бодалдарны, сөстерни катаптаарга израильчилерге Бурганның айтыышкынын, хоойлуларын сактып алыры база күүседири чиик турган (Лев. 18:4—22; Ы. х. к. 5:1).

Хевири. Библияның 10 хире хуузу — Ырлар, Соломоннуң ырызы, Иеремияның ыызы деп номнарда ышкаш ырылар. Чамдыкта ыры кожумактыг боор. Катаптаашкын ырының темазын онзалап демдеглээр, дыңнакчыларга сөстерни сактып алырынга дузалаар турган. Чижээ, Ырлар 113:17—19-ту көрүңер: «Израильчилер [Иеговага]... идегээр: Ол — оларга дузалап чоруур дозуг-камгалал. Аароннуң салгалы [Иеговага]... идегээр: Ол — оларга дузалап чоруур дозуг-камгалал. [Иеговадан]... коргуп чоруурлар Аңаа идегээр: Ол — оларга дузалап чоруур дозуг-камгалал». Катаптаашкын ыраажыларга үнелиг алыс шынны угаан-чүрээнге таңмалап алырынга дузалап турган боор.

Сорулгазы. Библияның бижикчилери кол бодалдарже кичээнгей салырда, чамдыкта кол сөстерни катаптаар турган. Ынчалдыр Иегова израильчилерге хан чивес деп айтыышкынны хөй катап катаптаарынче Моисейни оттурган. Шупту амылыг чүүлдүң амы-тыны — ханда; өскээр чугаалаарга, хан амы-тынны көргүскенин Бурган катаптаан (Лев. 17:11, 14). Сөөлзүредир, Иерусалимде элчиннер биле удуртукчулар христианнарга чагаазынга Бурганны өөртүрүн күзээн улус чүнү кылбазын бижиирде, хандан ойталаары чугулазын база катаптаан (Аж.-ч. 15:20, 29).

Ыдыктыг Бижилгеден үзүндүлерни бодал чок катаптаары чаңчыл апарзын деп, Иегова күзевээн. Чижээ, Иисус: «Мөргүп тургаш, ол-ла сөстерни катаптаваңар» — дээн (Мф. 6:7, Чаа делегей). А ооң соонда Бурганның күзелинге дүүштүр чүнүң дугайында мөргүп болурун чугаалаан (Мф. 6:9—13). Ынчангаш мөргүлдеривиске ол-ла сөстерни катаптавас-даа болзувусса, чаңгыс дилегни катап-катап чугаалап болур бис (Мф. 7:7—11).

Бодунуң Сөзүнге катаптаашкын кылыр шупту чылдагааннар Бурганда бар. Ол дээрге Өндүр улуг башкывыстың бисти өөредир аргаларының чүгле чаңгызы-дыр (Иса. 48:17, 18).