AY BAELTIK te machʼatik la stsʼibayik te Biblia la yalulanik chaʼoxpʼal kʼopetik o pʼalapʼal kʼopetik. ¿Bin yuʼun te jich la spasike? Kiltik oxchajp te binwan yuʼun jich la spasike:

Te bin-ora la yichʼ tsʼibayel. Ta lum Israel jteb ma spisil te ants winiketik maʼyuk yuʼunik jun copia yuʼun te Ley. Jteb ma spisil-ora ya schʼam yaʼiyik jaʼto te kʼalal ya stsob sbaik yuʼun ya yichʼ kʼoponel ta nailpakʼ templo sok ta templo (Deut. 31:​10-12). Jnopnax kaʼiytik te bayal bin ya xchʼaybot yoʼtanik yuʼun te jayeb ora tekʼajtik ta yolil te ants winiketike (Neh. 8:​2, 3, 7). Ta yorail-abi, yaʼiyel bayal buelta te kʼopetik te mukʼik skʼoplal ya xkoltayotik yuʼun ma xchʼay ta yoʼtanik sok yuʼun ya spas ta skuxlejalik. Te bitʼil bayal buelta ya yalulanike, ya xtuun yuʼunik te kʼalal ay bin mukʼ skʼoplal ya yichʼ albeyel skʼoplal, jich bitʼil te mantaliletik ta swenta te bin lek ya yil te Jehová sok te bin chajpanbil (Lev. 18:​4-22; Deut. 5:1).

Te bin-utʼil la yichʼ tsʼibayel. Te 10% yuʼun te Biblia jaʼ kʼayojiletik, tey ochem skʼoplal-a te Salmos, te El Cantar de los Cantares sok te Lamentaciones. Ay kʼayojiletik te yichʼojik jun Estribillo. Te kʼopil te ya yichʼ alulanel ya xtuun yuʼun ya yichʼ akʼel ta naʼel te stituloil te kʼayojil sok yuʼun oranax ya xjil ta oʼtanil te kʼayojile. Yuʼun ya kichʼbeytik swentail, kiltik te bin ya yal te Salmo 115:​9-11: «Israel, ¡acʼa smucʼulin awoʼtan te Jehová! Ha jcoltaywanej soc ha mahquilal awuʼunic. Sna Aarón, ¡acʼa smucʼulin awoʼtanic te Jehová! Ha jcoltaywanej soc ha mahquilal awuʼunic. Haʼex te awichʼojic ta mucʼ te Jehová, ¡acʼa smucʼulin awoʼtanic! Ha jcoltaywanej soc ha mahquilal awuʼunic». Kʼalal ay machʼa ya skʼayojtay te kʼayojil abi, maba ya xchʼay ta yoʼtan te bin ya yale.

Te bin yuʼun la yichʼ tsʼibayel. Ay chaʼoxtul te machʼatik la stsʼibayik te Biblia te la yalulanik chaʼoxpʼal kʼopetik, melel mukʼik skʼoplal sok yuʼun ya skʼan ya yakʼikxan ta naʼel. Jich bitʼil te kʼalal te Jehová la yalbey te israeletik te maba ya sweʼik chʼichʼ, la yalbey te Moisés te yakuk yalulan bayal buelta te mantalil ini. Te bin la skʼan te Dios jaʼ te yakuk xkʼot ta yoʼtanik te skuxlejal te chambalam ay ta schʼichʼel (Lev. 17:​11, 14). Bayal jaʼbil ta patil, kʼalal te jpuk-kʼopetik sok te ancianoetik ta Jerusalén la yalbeyik skʼoplal te bin ya skʼan ya jpʼajtik teme ya jkʼantik te lek ya yilotik te Dios, la yalik yan buelta te maba ya skʼan ya yichʼ tuuntesel te chʼichʼ (Hech. 15:​20, 29).

Manchukme te Biblia ay baeltik ya yalulan chaʼoxpʼal kʼopetik, ma skʼan ya yal te ya smulan te Jehová te jich kʼayemotik ta spasel, melel te Jesús jich la yal: «Te kʼalal ya akʼopon te Diose, mame junuknax te bin ya awalulanbey skʼoplale» (Mat. 6:7). Jaʼnix jich la yal te bintik ya xjuʼ ya kaltik te kʼalal ya jkʼopontik te Dios te jun ay sok te skʼanojel yoʼtane (Mat. 6:​9-13). Te kʼalal ya jkʼopontik te Jehová, maba jujuneb te bin ya kalbeytik, pero ya xjuʼ ya kalulanbeytik te bin yak ta kʼaxel ta jtojoltik chikan jayeb buelta (Mat. 7:​7-11).

¡Kʼax lek te Biblia ya yalulan yan buelta chaʼoxpʼal kʼopetik! Jaʼ jun te bin ya stuuntes swenta ya snojptesotik te Jehová, te Mukʼul Jnojpteswanej kuʼuntik (Is. 48:​17, 18).