КУДДЫРЪЯ Библиез гожъясьёс одӥг кылъёсты ик трос пол гожъяллязы. Эскеромы, малы соос озьы лэсьтӥзы.

Ку со гожтэмын вал. Вашкала Израильын тросэзлэн доразы Законэн свитокъёссы ӧй вал. Законэз кылзон понна, соос люкасько вал скиния азе, нош берлогес — храм азе (К. Зак. 31:10—12). Трос часъёс ӵоже адямиос сылыса кылзӥсько вал (Неем. 8:2, 3, 7). Соос жадё но вал, дыр, мукет куараос но люкето вал. Соин ик мае ке соос кылытэк но кылё вал, дыр. Нош Законын валтӥсь малпанъёс трос пол верамын вал бере, калыклы соосты валаны, тодазы возьыны но быдэсъяны капчигес вал (Лев. 18:4—22; К. Зак. 5:1).

Кызьы со гожтэмын вал. Библиын трос кырӟанъёс гожтэмын. Кылсярысь, Псалтирь, Кырӟанъёс пӧлысь кырӟан но Иеремиялэн бӧрдонэз. Куддыръя кырӟанъёсын одӥг кылъёс ик трос пол пумисько. Со кылъёс верало, мар сярысь кырӟан, но кырӟанэз йырын возьыны юртто. Кылсярысь, учкомы Псалтирез 113:17—19. Отын гожтэмын: «Израиль! Кузё-Инмарлы оскиськы: Со — асьмелэн юрттӥсьмы, дурбасьтӥсьмы. Аарон юрт! Кузё-Инмарлы оскиськы: Со — асьмелэн юрттӥсьмы, дурбасьтӥсьмы. Кузё-Инмарлэсь кышканэн улӥсьёс! Кузё-Инмарлы оскиське: Со — асьмелэн юрттӥсьмы, дурбасьтӥсьмы». Одӥг кылъёсты ик трос пол веран юрттэ вал кырӟасьёслы кулэ малпанъёсты йыразы возьыны но сюлмазы пыӵатыны.

Малы со гожтэмын вал. Куддыръя Библиез гожъясьёс, одӥг кылъёсты ик выльысь но выльысь гожъяллязы, валтӥсь малпанъёслы саклык висъян понна. Кылсярысь, куке Иегова израиль калыклы вераз, вирез сиыны уг яра шуыса, со куриз Моисеез та косонэз трос пол вераны. Инмарлэн возьматэмез потэ вал, вань улэп макеослэн улонзы вир пушкын шуыса. Мукет сямен вераса, вир — со улон (Лев. 17:11, 14). Берлогес, куке Иерусалимысь апостолъёс но тӧроос христианъёслы гожъязы, малэсь палэнскыны кулэ, Иеговаез шумпоттон понна, соос выльысь пусйизы, вир сиыны уг яра шуыса (Ап. уж. 15:20, 29).

Библиын одӥг кылъёс ик трос пол пумисько ке но, со уг возьматы, милемлы со кылъёсты дышетоно но со кылъёсты вераса вӧсяськоно шуыса. Иисус но шуиз: «Вӧсяськыкуды одӥг кылъёсты ик трос пол эн вералэ» (Матф. 6:7, ВД). Но со вераз, мар сярысь ми быгатӥськомы вӧсяськыны, вӧсяськонъёсмы Иеговалы ярамон мед луозы шуыса (Матф. 6:9—13). Вӧсяськыкумы одӥг кылъёсты ик ми трос пол ум вераське ке но, ми быгатӥськомы одӥг мар ке сярысь ик трос пол вӧсяськыны (Матф. 7:7—11).

Библиын одӥг кылъёс ик юнме трос пол верамын ӧвӧл. Та одӥгез гинэ амал, кызьы Иегова дышетэ милемыз (Ис. 48:17, 18).