NGA zwiṅwe zwifhinga, vhaṅwali vha Bivhili vho vha vha tshi dovholola maṅwe maipfi. Ṱhogomelani zwithu zwiraru zwine zwa nga vha zwo ita uri vha ite nga u ralo.

Tshifhinga tshe Bivhili ya ṅwalwa ngatsho. Tshifhingani tsha Vhaisiraele vhathu vhanzhi vho vha vhe si na kopi dza Mulayo. Mulayo wo vha u tshi vhalwa vhathu vhoṱhe vho kuvhangana denndeni ḽikhethwa. (Dot. 31:10-12) Zwi tou pfala uri ho vha hu tshi vha na zwithithisi ngauri vho vha vha tshi ima lwa tshifhinga tshilapfu vhe gogo ḽihulu vha tshi khou thetshelesa. (Neh. 8:2, 3, 7) Kha zwenezwo zwiitea, u dovholola maipfi a ndeme zwo vha zwi tshi ḓo leludzela vhenevho vhathu uri vha humbule Maṅwalo na u shumisa zwe vha zwi pfa. U dovholola maṅwe maipfi zwo vha zwi tshi ḓo vha thusa uri vha humbule zwidodombedzwa zwi re kha Mulayo we Yehova a vha ṋea.​—Lev. 18:4-22; Dot. 5:1.

Nḓila ye Bivhili ya ṅwalwa ngayo. Zwiṅwe zwipiḓa zwa Bivhili zwi ngaho sa dzibugu dza Dziphisalema, Luimbo Lwa Salomo na Zwililo ndi dzinyimbo. Nga zwiṅwe zwifhinga nyimbo dzo vha dzi na maipfi ane a dovhololwa hu u itela u ombedzela zwine luimbo lwa khou amba nga hazwo na u thusa vhathetshelesi uri vha kone u humbula maipfi alwo. Sa tsumbo, ṱhogomelani maipfi ane a vha kha Phisalema 115:9-11 ane a ri: “Iwe Isiraele, fhulufhela Yehova, ndi ene muthusi wau na tshiṱangu tshau. Inwi vha nnḓu ya Aroni, fhulufhelani Yehova, ndi ene muthusi waṋu na tshiṱangu tshaṋu. Inwi vha ofhaho Yehova, fhulufhelani Yehova, ndi ene muthusi waṋu na tshiṱangu tshaṋu.” U dovholola eneo maipfi zwi nga vha zwo thusa vhaimbi uri vha dzule vha khou humbula dzenedzo mbuno.

U itela u bvisela khagala mbuno dza ndeme. Nga zwiṅwe zwifhinga vhaṅwali vha Bivhili vho vha vha tshi dovholola maipfi a ndeme. Sa tsumbo, musi Yehova a tshi vhudza Vhaisiraele uri vha songo ḽa malofha, o ita uri Mushe a dovholole lunzhi-lunzhi tshiitisi tsha uri ndi ngani vha songo tea u a ḽa. Mudzimu o vha a tshi khou ṱoḓa u ombedzela uri vhutshilo ha tshithu vhu kha malofha atsho, zwine zwa amba uri malofha a imela vhutshilo. (Lev. 17:11, 14) Nga murahu musi vhaapostola na vhahulwane vha ngei Yerusalema vha tshi amba nga ha zwine Vhakriste vha tea u zwi iledza uri vha kone u takadza Mudzimu, vho dovha vha amba nga ha u sa ḽa malofha.​—Mish. 15:20, 29.

Naho hu na zwinzhi zwine Bivhili ya zwi dovholola, zwenezwi a zwi ambi uri Yehova u ṱoḓa ri tshi vha na nḓowelo ya u dovholola maipfi a re Bivhilini. Sa tsumbo Yesu o ri: “Musi ni tshi rabela, ni songo dovholola zwithu zwithihi lunzhi-lunzhi.” (Mat. 6:7) Yesu o dovha a ri vhudza zwithu zwine ra nga rabela nga hazwo, zwine zwa tshimbidzana na zwine Mudzimu a zwi funa. (Mat. 6:9-13) Naho ri sa ḓo dovholola maipfi mathihi lunzhi-lunzhi musi ri tshi rabela, ri nga rabela nga ha zwenezwi zwithu zwithihi lunzhi.​—Mat. 7:7-11.

Bivhili i na zwiitisi zwi pfalaho zwa u dovholola maṅwe maipfi. Ndi iṅwe ya nḓila nnzhi dzine Mufunzi washu Muhulwane a ri gudisa ngadzo uri ri vhuyelwe.​—Yes. 48:17, 18.