ANAMALEPA a Biibiliya, ikwaha sikina yaanitthikela olepa moolumo aromoliwe mbiibiliyani khalai-ru. Nrowe nthokorerye itthu tthaaru siwiirinhe opaka eyo:

Etthu ene yiirinhe olempwa. WIsarayeli wa khalai, atthu anceene khiyaarina ikoopiya sa Nlamulo wiira arumeeleke. Ikwaha sinceene, yakhalana eparakha ya owiriyana eliivuru ya Nlamulo esommwaka, okathi yoole yaathukumana aya otabernaakulu. (Otum. 31:10-12) Okathi naasommwa aya Nlamulo mwa iwoora sinceene ni opuro woowaatta atthu, akina khiyaawerya wiiwa saana, woonasa wene mwaha wa mathowa oovirikana. (Neh. 8:2, 3, 7) Tivonto, wiira awerye wiiwexexa, wuupuwelelaka ni ovarihela muteko malakiheryo ale yaasommwa, vaapirisari otthikeliwa oromoliwa iponto sirina efaita yuulupale. Otthikeliwa wa iponto suulupale, wanaakhaliherya atthu wuupuwela saana malamulo yaawo Muluku aavanhe awe atthu awe. — Onam. 18:4-22; Otum. 5:1.

Moota saalempwa aya. Mipantta sikina sa Biibiliya, silempwale ntoko masipo, ohela muhina eliivuru ya Esalimo, Nsipo n’Ophentana ni Wikhupanyerya. Masipo makina akhalana moolumo anikhala wiira arootthikeliwa. Nto moolumo awo annikhaliherya osuwela muru wa nsipo nno, nave annaakhaliherya ale aniwiriyana wuupuwelela moolumo awo. Mwa ntakiheryo, nwehe moolumo ari Esalimo 115:9-11 ani: “Nyuwo atthu a Isarayeli, mwaroromeleke Apwiya: awo t’anokhaliheryani ni t’aniwakihani. Nyuwo etthoko y’Àroni, mwaroromeleke Apwiya: awo t’anokhaliheryani ni t’aniwakihani. Nyuwo munattittimiha Apwiya, mwaroromeleke Apwiya: awo t’anokhaliheryani ni t’aniwakihani”. Niireke munnuupuwela moota moolumo ala atthikeliwe, yaarowa aya omukhaliherya mulipa-oowiriyana ohela mmuupuweloni ni vamurimani?

Etthu ene yiirinhe olempwa. Alipa-oomulepa Biibiliya, ikwaha sikina yanitthikelela moolumo arina efaita yuulupale. Mwa ntakiheryo, okathi Yehova aavanhe awe aisarayeli malakiheryo a ohilya ephome, Yehova aahimuruma Moise olepa mathowa ene ikwaha sinceene. Owo aaphavela ottittimiherya wiira ekumi ya enama, ephome. (Onam. 17:11, 14) Muhoolo mwaya, nuumala arummwa ni makhulupale a oYerusalemu olepa etthu yaareerela aya opaka, wiira amuhakalalihe Muluku ni etthu yahaareerela aya opaka wiira ahimuriipihe murima, awo yaahitthikela olavula sa ohilya ephome. — Mit. 15:20, 29.

Ekeekhai wiira moolumo ari mbiibiliyani makina arootthikeliwa, masi eyo khentaphulela wiira Yehova oniphavela wiira nimakeleke otthikela moolumo mamosa-ru. Mwa ntakiheryo, Yesu aahimmye so: “Mwaavekelaka, muhimakeleke oromola moolumo mamosa-ru”. (Math. 6:7) Masi aahilavula itthu nikhanle ahu oohelaka muhina okathi ninvekela ahu. (Math. 6:9-13) Nnaamwi nihireerelaka oromola moolumo mamosa-ru okathi ninvekela ahu, masi hiyo pooti othipelela oveka itthu iyo. — Math. 7:7-11.

Tthiri, aakhala mathowa ooloka yiirinhe mbiibiliyani otthikeliwa oromoliwa moolumo. Tthiri eyo, enamuna Mwiixuttihi ahu Muulupalexa onirumeela awe wiira oniixuttihe itthu sa efaita. — Yes. 48:17, 18.