BAIBEL bonjup ga ding yu kunum puli bonjup. Nalernge Baibel bonjup ga yu embe bonjup, mem talende paim omukro kanamen:

Bonjup kunum. Komna Israil kunum ga puli, Johova Lo boll mokjup enjep kopi dingding ne naambjip. Tempol gara enjip makeronjup kunum, Johova Lo boll mokjup gernambe pilpile enjip. (Lo. 31:​10-12) Ala alamb puli monjup bar anj dunglom auwa puli kel akil molo, yu gerjip pinjip bar, wal pende er kelnge yu nijip pilpol naronda tonjup. (Neh. 8:​2, 3, 7) Make embe mal tonjup bar, ding yu kerma kunum puli nijip pakerongo, bunuman a molngo nomolpa enjip bar konganem enjip. Ding yu kunum puli nijip enjep pake weirongo, Got Lo paim na alamb kot erngonda mal kanpol weirojup.—Wkp. 18:​4-22; Lo 5:1.

Nalmal bonjup. Yu Baibel meim 10 pesen mal golang meim—e, Buk Song, Solomon Golang, na buk Krai. Kunum pende ne golang mal keljip yu kunum puli nijip er kelnge, nijip ga bunuman a molngo ala buro yem kel pisam onom paim. Ende embe mal, Buk Song 115:​9-11 yu meim kane, embe dom: “Enem Israil ga enem Johova pilgi ninam—Olom enam kumbtapi mal molo, nganmal paim kunum enem pakronom. Enem Aron ngal kopam man, enem Johova bol pilgi ninam—Olom enem kumbtapi mal molo nganmal paim kunum enem pakerom nim. Enem Johova bol kisal gosum alamb, enem Jehova bol pilgi ninam—Olom enam kumbtapi mal molo nganmal paim kunum enem pakeronom.” Ding yu kunum puli embe nijip pakerongo golang kenjip ga, yuwei kawei kumbol a na bunuman a wei pinjip?

Nalmem pange yu embe bonjup. Baibel bonjup ga kunum pende ne, yu kerma mom kunum puli bonjup. Ende, Johova Israil ga maiyam nanoya nim kunum, nalmem pange embe nim, Mosis yu mem kunum puli neori kem. Got kapim kol meimen, maiyam mem paim ne pilkane enam ne yu kerma nepenem kem. (Wkp. 17:​11, 14) Embe pile, aposol na ga elda walem Jerusalem monjup, maiyam bol wal pende enambe Got kes pisa mal, yu kerma ala bollmene kele tuironam ne enjip.—Aposel 15:​20, 29.

Kunum pende ne Baibel ding yu kunum puli dom, ba Johova kenem embe enamen ne napisim. Jises embe nim: “Enem yane ninam kunum, ding yu anjngo naninam.” (Mat. 6:7) Olom yu pende nim bar, kenem yane ninamen kunum Got kapisem mal ninamen nepenem kem. (Mat. 6:​9-13) Embe pile, kenem yane ninamen kunum ding yu anjngo naninamen, yu pengem kerma pende simin kel pakle anjngo ninamen kun paim.—Mat. 7:​7-11.

Memka pande, Got murmulom dongal bu ngongo bonjup yu pende, Baibel kunum puli kangem darim. E wusngam kawei ende Tisa Kerma Mol Ngimba kerem, duwom erngonom yu pilsipe kenem pakeronda ne enem.—Ais. 48:​17, 18.