NDRAIKINDRAIKY irô mpanoratra Baiboly aby io man̈ampodimpody volan̈a araiky na volan̈a maromaro mitambatra. Diniha baka antony telo mety nahavy irô nan̈ano zen̈y:

Fotoan̈a nanoratan̈a Baiboly. Tamy faha Israely taloha tan̈y, ankamarozan’olo tsisy Lalàn̈a io voasoratra. Tamin’irô nivory tamy tran̈olay masin̈y fo ten̈a naharin̈esandrô famakian̈a izio. (Deot. 31:10-12) Tsy naro raha nazondrô onon̈o tamin’io, fôtony olo nikevikevy, aviô koa irô nitsangana fo tan̈atin’ny lera maro sady nitandren̈y. (Neh. 8:2, 3, 7) Amy raha karaha zen̈y, mila ampodimpody raha volan̈in’olo mamaky izio, amy zen̈y moramora amin’olo mitandren̈y mangala onon̈o ndreky man̈araka raha volan̈in’ny Soratra Masin̈y. Aviô koa, volan̈a sasany ampodimpody io koa nan̈ampy irô tsarabe hahatsiaro tsipirian-draha maro tamy lalàn̈an’ny Zan̈ahary namian̈a irô.​—Lev. 18:4-22; Deot. 5:1.

Fomba nanoratan̈a Baiboly. Kadirin’ny 10 isan-jaton’ny Baiboly io hira fo. Karaha zen̈y bokin’ny Salamo, Tononkiran’i Solomona, ndreky Fitomaniana. Matetiky amin’ny hira jiaby misy refrain, ke misy volan̈a mimpodimpody. Irô in̈y natao, baka tsy sarotro amin’olo mahatsiaro raha volan̈in’ny hira io. Ohatra araiky amy zen̈y, zahava baka volan̈a aby amy Salamo 115:9-11 ty: ‘A Israely e, matokisa Jehovah! Izy mpan̈ampy ndreky ampingandrô. Anarô taranakan’i Arona, matokisa Jehovah. Izy mpan̈ampy ndreky ampingandrô. Lan̈iany olo mavozo Jehovah, matokisa Jehovah. Izy mpan̈ampy ndreky ampingandrô.’ Asa hitanao baka amy zen̈y fa irô volan̈a nampodimpody aby io, nahavy irô olo aby nihira izio nalaky nahazo onon̈o raha koran̈in’ny hira io?

Izikoa fa nisy hevitry maventy tian̈a hankamafisin̈y. Ndraikindraiky irô olo nanoratra Baiboly io nan̈ampodimpody fitambaran’ny volan̈a nisy hevitry maventy. Karaha ataony tamy Jehovah nampianatra irô Israelita aby io fa lio io tsy mahazo ahanin̈y, natetiky nampodimpodin’i Mosesy antony tsy hihinanan̈a izio. Tian’ny Zan̈ahary hankamafisin̈y baka fa an̈atin’ny lio ao fahin̈ana, ke lio manôndro fahin̈ana. (Lev. 17:11, 14) Aviô koa, efa taon̈o maro tafara tatỳ, irô apostoly ndreky anti-pan̈ahy aby ta Jerosalema tan̈y nan̈ambara irô raha jiaby mila fadin̈a, baka hamparavoravo Zan̈ahary. An̈isan’ny raha mbala nampodindrô ndraiky, atsika mila fady lio.​—Asa. 15:20, 29.

Fa zen̈y tsy mivolan̈a fa tian’i Jehovah atsika han̈ano fahazaran̈a han̈ampodimpody volan̈a amy Baiboly ao. Zahava baka volan̈an’i Jesosy ty: “Anarô ndraiky koa mivavaka, aza man̈ampodimpody volan̈a mitovy fo.” (Mat. 6:7) Izy baka tiô nan̈amia hevitry amy raha isan-karazany mety koran̈intsika amy vavaka, ke mifan̈araka amy sitrapôn’ny Zan̈ahary. (Mat. 6:9-13) Fa na atsika mila mitandrin̈y baka tsy han̈ampodimpody volan̈a araiky fo izikoa fa mivavaka, atsika mety mivavaka matetiky momba raha araiky.​—Mat. 7:7-11.

Misy antony matoa Baiboly man̈ampodimpody volan̈a ndreky fitambaran’ny volan̈a sasany. Izio an̈isan’ny fomba fampianaran’ny Mpampianatra Be Voninahitry io atsika, raha mahatsara atsika.​—Isaia 48:17, 18.