NDAŴI syejinji ŵakulemba Baibulo ŵalembaga maloŵe gane mwakuwilisyawilisya. Kwende tulole magongo gatatu gagatendekasyaga jemanjaji kutenda yeleyi:

Ndaŵi jaŵalembile yinduyo. Mu ndaŵi ja Ayisalayeli, ŵandu ŵajinji nganakola mipukutu ja Chilamusi. Jemanjaji ŵagambaga kupikana Chilamusichi pachaŵalanjidwaga pasongene pampepe ku nyumba ja Mlungu. (Det. 31:​10-12) Ngatukayichila kuti jemanjaji ŵalagaga kupikanichisya yindu yine ligongo lyakuti ŵaŵaga ali ajimi kwandaŵi jelewu soni pagulu ja ŵandu ŵajinji. (Neh. 8:​2, 3, 7) Pandaŵi mpela jeleji, kuwilisya maloŵe gane kwakamuchisyaga ŵanduwo kukumbuchila malemba gane soni kulola yampaka ajile pakugakamulichisya masengo. Kupwatika pelepa, kuwilisya maloŵe gane kwakamuchisyaga mnope jemanjajo kukumbuchila mfundo sine syakusosekwa mnope mpela malamusi gosope giŵapele Yehofa.—Lef. 18:​4-22; Det. 5:1.

Litala lyaŵakamulichisye masengo pakulemba nganijo. Chiŵandika 10 pelesenti ja maloŵe gaŵagalembile m’Baibulo, ŵagalembile mpela nyimbo. Gane mwa maloŵega gakusasimanikwa m’buku ja Masalimo, Nyimbo ja Solomo nambosoni m’buku ja Malilo. Ndaŵi sine nyimbo sikusakola maloŵe gakuwilisya pakusaka kumkamuchisya jwakupikanila kukumbuchila maloŵego mwangasawusya. Mwachisyasyo, alole maloŵe gagakusasimanikwa pa Salimo 115:​9-11. Pa lilembali pakusati, “M’mwe Isalaeli mwakulupilile AMBUJE, AMBUJE ali ŵakumkamuchisya ni ŵakumchenjela. M’mwe liŵasa lya Aloni, mwakulupilile AMBUJE, AMBUJE ali ŵakumkamuchisya ni ŵakumchenjela. Jemanja ŵakumjogopa AMBUJE, mumkulupilile. AMBUJE ali ŵakumkamuchisya ni ŵakumchenjela.” Kusala yisyene, kuwilisyawilisya maloŵe gelega kwakamuchisye ŵakwimbaŵa kuti akumbuchileje mfundo syakusosekwa mnopesi.

Pakusaka kugombelechesya mfundo syakusosekwa mnope. Ndaŵi sine ŵakulemba Baibulo ŵawilisyaga maloŵe gane gakusosekwa mnope. Mwachisyasyo, Yehofa paŵasalile Ayisalayeli kuti akalyaga myasi, ŵamsalile Mose kuti ŵasalile jemanjajo mwakuwilisyawilisya magongo gakutendela yeleyi. Pelepa Mlungu ŵasakaga kugombelechesya kuti umi wa chindu ukusaŵa m’myasi, yayikugopolela kuti myasi jikusajimila umi. (Lef. 17:​11, 14) Pali papitile ndaŵi, ŵandumetume soni achakulungwa ŵa ku Yelusalemu paŵalembaga yindu yakusosekwa kuyiŵambala Aklistu pakusaka kumsangalasya Mlungu, ŵagombelechesye mfundo ja kusosekwa kwa kuŵambala myasi.—Mase. 15:​20, 29.

Atamose kuti Baibulo jikusasala maloŵe gane mwakuwilisyawilisya, yeleyi yangagopolelaga kuti Yehofa akusasaka kuti tutendeje yakulandanayo. Mwachisyasyo, Yesu jwasasile kuti, “Pamkupopela mkasalaga yindu yimo peyo mwakuwilisyawilisya.” (Mat. 6:7) Kaneko jwalakwe jwasasile yindu yekulungwakulungwa yampaka tuyisale m’mapopelo getu yakamulana ni chakulinga cha Mlungu. (Mat. 6:​9-13) Myoyo atamose kuti tukusasosekwa kuŵambala kuwilisya maloŵe gagogo m’mapopelo getu, yeleyi yangatulekasyaga kupopelela ngani syatwasikolasile kala m’mapopelo getu.—Mat. 7:​7-11.

Kusala yisyene, Maloŵe ga Mlungu gakusawilisyaga maloŵe gane pa magongo gakupikanika. Kuwilisya maloŵe gane m’Baibulo ligambile kuŵa litala limpepe pa matala gakusakamulichisya masengo Yehofa pakutujiganya.—Yes. 48:​17, 18.