PIIN ur yoloyed e Bible e bay yu ngiyal’ ni yad ma sul u daken boch e thin ni boor yay. Am lemnag dalip i fan nrayog ni ur rin’ed e re n’ey:

Ngiyal’ nni yoloy e pi thin nem. Yooren e girdi’ u Israel kakrom e dariy babyoren fare Motochiyel rorad. Ba ga’ ni fin yad ma rung’ag e thin ni bay ko fare Motochiyel ni yibe beeg u nap’an ni ke muulung girdien e re nam nem ko fare tabernacle. (Deut. 31:​10-12) Dabisiy nrayog ni nga i magawonnagrad boch ban’en u nap’an ni kar muulunggad nga taabang ni yad be motoyil u lan boor e awa ni yad ba sak’iy. (Neh. 8:​2, 3, 7) Ere faan yira sul u daken boch e thin nib ga’ fan, ma rayog ni nge mom ngorad ni nge dab ra paged talin boch e thin ni bay u lan e babyor nib thothup mar folgad riy. Faanra un sul u daken boch e thin ni boor yay, ma rayog ni nge ayuwegrad ni nge dab ra paged talin boch ban’en ni bay ko pi motochiyel ni ke pi’ Jehovah ngorad.​—Lev. 18:​4-22; Deut. 5:1.

Rogon nni yoloy e pi thin nem. Sogonap’an 10 e pasent ko Bible e bogi tang nib muun ngay fapi babyor ko Psalms, nge Tang rok Solomon, nge Lamentations. Bay yu ngiyal’ ni yima sul u daken boch e thin u lan reb e tang, ma re n’ey e ma gagiyelnag e n’en be weliy fare tang murung’agen me ayuweg e piin yad be motoyil ni nge mit e thin riy ngorad. Mu tay fanam i yan ko fapi thin ni bay ko Psalm 115:​9-11 ni be gaar: “Gimed piyu Israel, um pired ni Somol e ba pagan’med ngak! Yi ir e be ayuwegmed ma be yoror romed. Gimed e pi prist rok Got, um pired ni Somol e ba pagan’med ngak! Yi ir e be ayuwegmed ma be yoror romed. Gimed urngin e piin ni bay madgun Somol u wun’med, um pired ni Somol e ba pagan’med ngak! Yi ir e be ayuwegmed ma be yoror romed.” Faanra sul e piin yad be yon’ e re tang ney u daken taab n’en, ma rayog ni nge ayuwegrad ni nge rich e pi thin nem nga gum’ircha’rad.

Ngan tamilangnag boch ban’en nib ga’ fan. Piin ur yoloyed e Bible e bay yu ngiyal’ ni ur sulod u daken boch e thin nib ga’ fan. Bod nnap’an ni yog Jehovah ngak piyu Israel ndab ra ked e racha’, ma aram me yog ngak Moses ni nge sul u daken fan ni ke yog e pi thin nem ni boor yay. Baadag Got ni nge tamilangnag ni yafos ko gubin ban’en nib fos e bay u fithik’ e racha’ riy, ma racha’ e be yip’ fan e yafos. (Lev. 17:​11, 14) Boch nga tomuren u nap’an ni yoloy e pi apostal nge piin piilal u Jerusalem nga but’ murung’agen boch ban’en nib t’uf ni nge siyeg e piin Kristiano ya nge yag nra pared ni yad ba fel’ u wan’ Got, ma aram mu kur sulod bayay u daken nga rogned nib t’uf ni ngan palog ko racha’.​—Acts 15:​20, 29.

Yugu aram rogon ni bay boch e thin ni be sul e Bible u daken, machane der yip’ fan ni baadag Jehovah ni ngad mechameged ngodad ni ngaud sulod u daken e thin ni kan yoloy nga Bible ni boor yay. Bod ni gaar Jesus: “Faanra mmeybilgad ma dab um sulod u daken taab bugithin ni pire’ yay.” (Matt. 6:7) Tomuren me weliy murung’agen boch ban’en nrayog ni ngad yibilayed nib puluw ko n’en nib m’agan’ Got ngay. (Matt. 6:​9-13) Ere yugu aram rogon nsusun e dab ud sulod u daken taab bugithin u lan e meybil rodad, machane rayog ni ngad yibilayed murung’agen ban’en ni boor yay.​—Matt. 7:​7-11.

Bay fan ni be sul e Thin rok Got u daken yu bugithin nge boch e thin ni boor yay. Aram reb e kanawo’ ni be fil e Bin Th’abi Ga’ e Sensey riy ngodad boch ban’en ni gadad e nge yib angin ngodad.​—Isa. 48:​17, 18.