KHUMBU ziwombo minsoniki mi Kibibila baba vutukilanga bikuma. Tuemmona mambu matatu manata minsoniki mi Kibibila kuvanga mawu:

Thangu mawu masonama. Bawombo mu basi Isaeli, basa ba ko kopia yi masonoko. Bawu baba kuwanga bo baba tanganga Nsiku vantuala dikabu ku nzo yinlongo. (Deute. 31:​10-12) Ḿba disa ba ko diambu diluelu kusikika thalu mu mambu baba kuwanga mu kuba mu nkangu wunneni wu batu ayi mu bilokula biwombo baba viokisanga kuna. (Nehe. 8:​2, 3, 7) Khumbu ziwombo baba vutukilanga bikuma, muingi kusadisa dikabu kutebukila moyo mambu baba kuwanga ayi kusadila mawu. Kuvutukila mua bikuma, kusadisa dikabu muingi kutebukila moyo nsiku Yave kaba vana.—Levi. 18:​4-22; Deute. 5:1.

Ntindu bisona. Zibuku zinkaka zi Kibibila zidi zi minkunga, dedi muidi buku yi Minkunga, Minkunga mi Salomo ayi Mayongi. Minkunga minkaka muba bikuma baba vutukilanga, muingi kubuela tsundu yi nkunga ayi kusadisa batu baba mikuwanga muingi kulunda miawu vantu. Dedi, mona bikuma basadila mu Minkunga 115:​9-11 bintuba: ‘Ho Isaeli, fiatila mu Yave—Nandi widi nsadisiaku ayi nkakuaku. Ho nzo yi Aloni, fiatila mu Yave—Nandi widi nkakuaku ayi nsadisi’aku. Benu muke boma bu Yave, fiatilanu mu Yave—Nandi widi nsadisi’aku ayi nkaku’aku.’ Ngie wulenda yindula buidi kuvutukila bikuma abiobio kusadisila kunyikuna mabanza ayi mintima mi minyimbidi?

Nkinza wu kutubila mambu mamfunu. Minsoniki mi Kibibila khumbu ziwombo basadila bikuma binkinza beni. Dedi, bo Yave kavana nsua kuidi basi Isaeli matedi kutatuka menga, nandi wukamba Mose muingi kavutukila kutubila nsua awowo khumbu ziwombo. Nzambi waba tomba kumonisa ti luzingu lu bivangu bioso bi kinsuni luidi mu menga, mawu mansundula ti menga luzingu. (Levi. 17:​11, 14) Kuntuala, bapostolo ayi bakulutu ku Yelusalemi, batubila matedi nkinza wu kutatuka menga.—Mava. 15:​20, 29.

Kheti Kibibila kimvutukila bikuma, mawu masinsundula ko ti Yave wuntomba muingi tuba kifu ki kuvutukilanga bikuma bi Kibibila. Dedi, Yesu wutuba: “Bo wunsambila, bika kuevutukilanga momawu mambu.” (Matai 6:7) Nandi wutubila mambu mankiza tulenda dinda mu nsambu, madi nguizani na luzolo lu Nzambi. (Matai 6:​9-13) Kheti Kibibila kitulubula tubika kuvutukila biobiawu bikuma mu nsambu, befu tuidi luaku lu kusola bikuma binkinza tulenda vutukila.—Matai 7:​7-11.

Diawu vadi kibila kinkinza beni, Diambu di Nzambi dimvutukilanga bikuma binkaka. Ayi yidi phila Nlongis’itu Wulutidi ka tulongilanga muingi tubaka ndandu.—Yesa. 48:​17, 18.