LE MÁAXOʼOB tsʼíibt le Bibliaoʼ yaan kʼiineʼ tu repetirtoʼob jujunpʼéel tʼaanoʼob. Koʼoneʼex ilik óoxpʼéel baʼax oʼolal maʼ xaaneʼ tu beetoʼob beyoʼ:

Le época ka tsʼíibtaʼaboʼ. Tu kʼiinil le israelitaʼoboʼ maʼ yaʼab máakoʼob yaantiʼob u copiail le Leyoʼ. Le oʼolal maases ku yuʼubikoʼob u xoʼokol le kéen u muchʼubaʼob teʼ tabernáculo wa teʼ templooʼ (Deu. 31:​10-12). Maʼ xaaneʼ maʼ chéen chʼaʼabil kaʼach u beetkoʼobiʼ tumen yaʼaboʼob yéetel yaan u waʼataloʼob ich yaʼab horaʼob (Neh. 8:​2, 3, 7). Yoʼolal leloʼ ku kʼaʼabéettal kaʼach u repetirtaʼal jujunpʼéel tʼaanoʼob utiaʼal u tʼíilil tu pooloʼob yéetel utiaʼal u tsʼáaikoʼob ichil u kuxtaloʼob. Seguramente lelaʼ tu yáantaj le israelitaʼob utiaʼal maʼ u tuʼubultiʼob le baʼaxoʼob sen táakaʼan ichil le leyoʼob tsʼaʼabtiʼob tumen Diosoʼ (Lev. 18:​4-22; Deu. 5:1).

Según baʼax le tu tsʼíibtoʼoboʼ. Kex u 10 por cientoil tiʼ le baʼaxoʼob tsʼíibtaʼab teʼ Bibliaoʼ kʼaayoʼob jeʼex Salmos, El Cantar de los Cantares yéetel Lamentaciones. Jujunpʼéel tiʼ le kʼaayoʼobaʼ ku taasik u coroil, lelaʼ ku meyaj kaʼach utiaʼal u yeʼesaʼal tiʼ baʼax ku tʼaan le kʼaayoʼ yéetel utiaʼal u séeb pʼáatal tu pool máak. Junpʼéel ejemplo tiʼ lelaʼ tiaʼan teʼ Salmo 115:​9-11: «U kajnáalileʼex Israel, kʼub a wóoleʼex tiʼ Jéeoba, letiʼ áantkeʼex, bey junpʼéel escudo yanil tiʼ teʼexeʼ. U paalal Aarón, kʼub a wóoleʼex tiʼ Jéeoba, letiʼ áantkeʼex, bey junpʼéel escudo yanil tiʼ teʼexeʼ. Teʼex ka adorarkeʼex Jéeobaeʼ, kʼub a wóoleʼex tiʼ Jéeoba, letiʼ áantkeʼex, bey junpʼéel escudo yanil tiʼ teʼexeʼ». Le u repetirtaʼal le tʼaanoʼobaʼ seguramente tu yáantaj le máaxoʼob ku kʼaayoʼob utiaʼal ka pʼáatak tu pooloʼob le jatsʼuts baʼaloʼob ku kaʼansikoʼ.

Tumen u kʼáat u yeʼesoʼob importante junpʼéel tʼaan. Yaan tiʼ le máaxoʼob tsʼíibnajoʼoboʼ tu repetirtoʼob tʼaanoʼob importanteʼob. Jeʼex le ka tu yaʼalaj Jéeoba tiʼ le israelitaʼob maʼ u jaantikoʼob kʼiʼikʼoʼ tu yaʼalaj tiʼ Moisés ka u repetirt yaʼab u téenel baʼax oʼolal maʼ unaj u beetkoʼobiʼ. Jéeobaeʼ u kʼáat kaʼach ka u naʼatoʼob tubeeleʼ le kuxtaloʼ tiaʼan teʼ kʼiʼikʼoʼ (Lev. 17:​11, 14). Ka máan kʼiineʼ le apóstoloʼob yéetel le ancianoʼob yanoʼob Jerusalénoʼ tʼaanajoʼob tiʼ le baʼaloʼob unaj k-evitartik wa k-kʼáat lúubul utsil tiʼ Diosoʼ, le oʼolal kaʼa tʼaanajoʼob tiʼ baʼaxten kʼaʼabéet u náachkuntkuba máak tiʼ le kʼiʼikʼoʼ (Hech. 15:​20, 29).

Kex ichil le Biblia ku repetirtaʼal jujunpʼéel tʼaanoʼoboʼ maʼ u kʼáat u yaʼal wa Jéeobaeʼ u kʼáat ka suukak k-repetirtik wa k-rezartik le baʼaxoʼob yaan ichil le Bibliaoʼ. Juntéenjeakeʼ Jesúseʼ tu yaʼalaj: «Kéen orarnakech túuneʼ maʼ a babal aʼalik junpʼéeliliʼ baʼal» (Mat. 6:7). Le ka tsʼoʼokeʼ tʼaanaj tiʼ yaʼab baʼaloʼob jeʼel u páajtal k-táakbesik ichil le oraciónoʼob k-beetkoʼ (Mat. 6:​9-13). Le kéen orarnakoʼon tiʼ Jéeobaeʼ maʼatech k-aʼalik le mismo tʼaanoʼoboʼ, chéen baʼaleʼ jeʼel u páajtal k-orar yaʼab u téenel yoʼolal junpʼéel baʼaleʼ (Mat. 7:​7-11).

Jach ku yáantkoʼon u repetirtaʼal jujunpʼéel tʼaanoʼob ichil le Bibliaoʼ. Leloʼ junpʼéel bix u kaʼanskoʼon Jéeoba utiaʼal ka xiʼiktoʼon utsil (Isa. 48:​17, 18).