GUYUU biaje bizeeteʼ ca hombre ni bicaa Biblia xiixa diidxaʼ chupa chonna biaje, ne dede biquiiñecabe ngueca diidxaʼ ra bizeetecabe de laani sti biaje. ¿Xiñee bíʼnicabe ni yaʼ? Guidúʼyanu chonna razón ni zándaca bicaa laacabe gúnicabe ni:

Padxí gucuá ni. Ndaaniʼ guidxi Israel de dxiqué, qué gapa stale de ca binni que ti copia stiʼ Ley. Rucaadiágacabe ni nani ora raca reunir guidubi guidxi que para guʼndanécabe ni laacaʼ ra tabernáculo ne ra templu (Deut. 31:​10-12). Guníʼ ique si xi guiráʼ ruchiiñaʼ laacabe, xadxí ruzuhuaacabe ne riuucabe lade stale binni. (Neh. 8:​2, 3, 7). Ngue runi ora rizaaca nga, riníʼcabe ca diidxaʼ que chupa chonna biaje ne nga racané ca binni que guiziidicaʼ ne chinándacaʼ ni cucaadiágacaʼ. Ne galán rúnicabe riníʼcabe ca diidxaʼ que sti biaje ora chiguzeetecabe xiixa ni napa stale detalle, casi ca norma ne ca ley (Lev. 18:​4-22; Deut. 5:1).

Ximodo gucuá ni. Gucuá caadxi de ca libru stiʼ Biblia casi canción, casi ca Salmos, El Cantar de los Cantares ne Lamentaciones. Napa caadxi de ca canción ca ti estribillo, laani nga caadxi diidxaʼ ni riete chupa chonna biaje para ganna binni xidé caníʼ canción ca ne ganda guiziidicabe ni nagueenda. Para guiénenu ni cuzéʼtenu riʼ, guidúʼyanu ni ná Salmo 115:​9-11: «Guidxi Israel, gupa confianza Jehová. (Laabe nga ni racané lii ne escudu stiluʼ). Ca ni zá de Aarón, lagapa confianza Jehová. (Laabe nga ni racané laatu ne escudu stitu). Laatu, ca ni ridxibi Jehová, lagapa confianza Jehová. (Laabe nga ni racané laatu ne escudu stitu)». Ora ruundaʼ tuuxa canción ca, nuunu seguru nagueenda riziidibe ni nani.

Xiñee gucuá ni. Caadxi hombre ni bicaa Biblia, bizeetecaʼ caadxi diidxaʼ purtiʼ risaca ca ni. Guzéʼtenu ti ejemplu para guiénenu ni. Dxi gudxi Jehová ca israelita que cadi gocaʼ rini, biquiiñebe Moisés para guiníʼ stale biaje xiñee nabé risaca cadi gúnicabe ni. Ni racalaʼdxiʼ Dios nga guiénecabe rini ca nga guendanabani stiʼ binni (Lev. 17:​11, 14). Gudiʼdiʼ si stale iza, ora guníʼ ca apóstol ne ca ancianu de Jerusalén de ca cosa ni cadi naquiiñeʼ gúninu para gusiéchenu Dios, bizeetecabe pabiáʼ risaca guni rechazarnu rini (Hech. 15:​20, 29).

Neca riete caadxi diidxaʼ chupa chonna biaje lu Biblia, qué riníʼ diʼ nga racalaʼdxiʼ Jehová guzéʼtenu caadxi diidxaʼ ni zeeda lu Biblia stale biaje, casi xa ñaca cayúninu ti rezá. Jesús peʼ guníʼ ca diidxaʼ riʼ: «Ora guni orarluʼ, cadi guiniʼluʼ ngueca ca ngueca» (Mat. 6:7). Laaca bizeetebe xcaadxi cosa ni zanda guinábanu lu ca oración stinu ne biaʼsi ca ni né ni racalaʼdxiʼ Jehová guni (Mat. 6:​9-13). Neca cadi ngueca ca ngueca diidxaʼ riquíʼñenu ora runi orarnu Jehová, peru zanda gábinu laabe stale biaje ni maca gúdxinu laabe ante (Mat. 7:​7-11).

¡Galán nga stale biaje riete xiixa diidxaʼ o caadxi diidxaʼ lu Biblia! Nga nga ti modo riquiiñeʼ Maestru ni jma risaca stinu para gusiidiʼ laanu ti cheni laanu galán (Is. 48:​17, 18).