ABAKE Ziazia Kekeapai ti kura aregbo ake kina gu bangisapai agu akurayo aima kehe. Oni bingo nduapai biata nga gu narengbe kadu namaapai kurii abakehe i mangi gipai re:

Gu regbo i akehe ti ni. Ti regbo agu aYisaraere nadu mbata, dungu aboro aadunga na akitabu aNdiko te. I anaagia aNdiko i nigedihe kuari ho aboro anidunguratiyo ni ku banye yo. (Pa Rug. 31:10-12) Si nawira wa dungu apai anidu kinaho naagbe berãyo wa i anaadegatuyo kini ru kuari tipa dungu asaa dagba dungu aboro. (Nem. 8:2, 3, 7) Ti ngbatunga agu regbo re, dogoda kura memeapai aima rengba ka sa ha fuyo taata i tingidi averesi na ki mangipai kutini rogo gayo raka yo. Dogoda kura afugo aima rengba ka undo yo gbe tipa i tingidi futufutuapai tipa agu aNdiko Yekova afuhe fuyo.​—Pa Mot. 18:4-22; Pa Rug. 5:1.

Gu gene i akehe ngbaha. I ake gu kura papara aBaibiri ni abia, ni kpiapai, agu akitabu nga Atambuahe, Ga Soromo Bia, na Abia Kpenunga. Gu kura abia adu na agu afugo rogoyo i apehe bara dunguhe. Gipai re aanyakasa gu banguapai nga ga gu bia re. Ni kpiapai, oni bingo agu afugo du rogo Atambuahe 115:9-11: “Ako aYisaraere, oni kida kuti Yekova!​—Ko nga gayo mounda nga gayo vurakube. Ako ngbatunga Arona, oni kída kuti Yekova!​—Ko nga gayo mounda nga gayo vurakube. Agu roni nagunde ti Yekova, oni kida kuti Yekova!​—Ko nga gayo mounda nga gayo vurakube.” Pa dogoda agu afugo re aima rengba ka undo ababibia tipa i zi gi wene afugo re ku kpotoyo yo.

Si aaida i nyakasi nyanyakipa apai. Ti kura aregbo, si anaaida abake Ziazia Kekeapai naadogoda nyanyakipa apai adogoda. Ni kpiapai, ho Yekova afu rugapai ni fu aYisaraere ka i ri nga kure ya, ko ape gupai fu Moize nga ko dogodi gipai re bara dunguhe. Mbori aaida ka nyakasa gupai nga unga du rogo kure yo, sidu, naida ka ya kure aarukuba unga. (Pa Mot. 17:11, 14) Kusa ho amokedi na agu abaakumba naadu Yerusarema yo akepa agu apai ni si aaida aKristano nehe ka zanga ba gberãrago ti Mbori, i anyakasi pa ne kure berewe.​—Amo. 15:20, 29.

Wa vura duhe nga Baibiri nadogoda kuraapai, gipai re ayugongo gupai nga Yekova naida gupai nga si naida si du ni sinorani kaa dogoda fugo Baibiri te. Ni kpiapai, Yesu aya: “Wa oni akpara ka oni kpari nga ni dogodi gu kpe ni ba sa sa” ya. (Mt. 6:7) Ko andu kumbatayo ka fura furani tipa agu apai rengbe ani ka manga kparakpee tipaha du na ngbanya dagbaha na gupai Mbori akpinyemuhe. (Mt. 6:9-13) Wa vura duhe nga ani adogoda nga bangisa fugo bara dunguhe te, ani ima rengba ka manga kparakpee tipa riipai sa bara dunguhe.​—Mt. 7:7-11.

Wene nduapai kinaho i nadogodi gu kuraapai ti ni rogo Fugo Mbori yo. Si nga gene sa dagba gu dungu agene gaani bakere bayugupai ayugopai ngbaha furani ani gbia undo.​—Yes. 48:17, 18.