Ke wa kane Baiblo ɔ, nɛ wa hla níhi a mi ɔ, wa ma nyɛ maa na junehi nɛ a he hia. Se kɛ wa ma ná june nɛ ɔmɛ a he se kɛ pi si ha kɛɛ?

Moo kase babauu kɛ kɔ níhi nɛ ya nɔ nɛ Baiblo ɔ tu a he munyu ɔ. Kaa nɔ hyɛmi nɔ́ ɔ, moo hyɛ kaa o maa le nɔ nɛ ngma jamɛ a munyu ɔ, nɔ nɛ e ngma kɛ ya ha, kɛ be mi nɛ e kɛ ngma a lo. Kɛ si himi ɔ ngɛ ha kɛɛ ngɛ jamɛ a be ɔ mi, mɛni nɛ e ba hyɛ, nɛ mɛni ya nɔ ngɛ lɔ ɔ se?

Moo hyɛ níhi nɛ o ma nyɛ maa kase ke o hla níhi a mi kɛ kɔ sane bimi nɛ ɔmɛ a he: ‘Kɛ nihi nɛ o kane a he ní ɔ nu he ha kɛɛ? Mɛni suhi nɛ a je kpo? Mɛni he je nɛ e sa nɛ ma kase jamɛ a su ɔmɛ aloo ma kua a?’

O kɛ níhi nɛ o kase ɔ nɛ tsu ní ngɛ fiɛɛmi mi loo ngɛ bɔ nɛ o kɛ nihi hiɔ si ha a mi. Ke o kɛ níhi nɛ o kase ɔ tsu ní ɔ, lɔ ɔ tsɔɔ kaa o ngɛ nile nɛ je hiɔwe ɔ. Baiblo ɔ de ke: “Nɔ nɛ ji ní lelɔ ɔ, e susu ní nɛ ɔmɛ a he.”—La 107:43.

• Oti: Moo hyɛ bɔ nɛ otsi kpɛti kpe ɔ fã nɛ ji Juetli Nɛ Ngɛ Mawu Munyu ɔ Mi ɔ yeɔ bua wɔ nɛ waa kɛ níhi nɛ wa kaseɔ ɔ tsuɔ ní ha. Fã nɛ ɔ yeɔ bua wɔ nɛ wa naa sanehi nɛ wa ma nyɛ ma bi wa he, otihi nɛ wa ma nyɛ ma pue wa yi mi tɛ ngɛ he, kɛ fonihi nɛ wa ma nyɛ ma susu a he.