Nɔ èhlɛnkɔ Biblaɔ, àtɛnŋ aji enu gɔnmɛ kpɔ keŋ akpɔ Bibla mɛ nuveviwo. Vɔ lé mìawɛ akpɔ nyɔna sugbɔ so mɛɔ?

Ji dui nɔ Bibla mɛ xolɔlɔ lɔwo kpɔ doji. Le kpɔwɛ mɛ, ji mɛ ci yí ŋwlɛ akpaxwe lɔ, mɛ ci eŋwli nɔ koɖo hwenu eŋwli. Nɔnɔmɛ ciwo mɛ eŋwlɛ enu lɔ leɔ? Nyiwo yí jɔ doŋkɔ gbɔxwe eŋwlɛ enu lɔɔ, yí nyiwo yí vajɔ kplɔɛdoɔ?

Ji nukplamu lɔ nɔ èwakɔ numɛkuku so nyɔbiɔse cɛwo nu shigbe: ‘Lé enu wa do nɔ mɛ ciwo nu ŋhlɛnkɔ nu soɔ? Jijɔ ciwo yí le wo shiɔ? Nyi yí taɖo ŋɖo asran wowo nɔnɔmɛwo alo agbe woɔ?’

Wa do nukplamu ciwo yí èkpɔ ji yí woakpedo eo nu taŋfuin le kunuɖegbe alo lé èwanɔ nu ɖaɖa mɛbuwo gbɔ do. Nɔ èwɛ ahan ɔ, anyi èɖo ŋununyanya ci yí so Mawu gbɔ shigbe lé Bibla nui nɛ yí mɔ: “Nɔ amɛ ɖe nyi ŋununyatɔɔ, a ɖo ŋwi enu hunnɔwo [alo áwa do ji].”—Eha. 107:43.

• Lé àwɛ do: Kpɔ lé enumɛɖeɖe ciwo yí le Mawu Nyɔ mɛ dɔkunuwo ci wowanɔ le kwɛshila dodomɛ bɔbɔ mɛ akpedo eo nu nabu tamɛ kpɔ so lé awa do enu ci èkpla ji do. Blaŋblaŋ ɔ, enyɔ vevi ciwo mìatɛnŋ abiɔ mìwoɖekiwo se, susu ciwo nu mìatɛnŋ abu tamɛ kpɔ so koɖo foto ciwo mìatɛnŋ agbeje nɔnɔ akpaxwe ŋtɔ́.