Ano micekiw to Fangcalay Cudad i, ngaˈayay kilimen ita ko milingatay a lalakaw mikadkad to odoˈ no sinael. Sasamaan mikitira milifok to adihayay a epoc hani?

Calepen mikadkad ko maˈoningay a demak no Fangcalay Cudad. Tinakoen, cima ko pasowalay, cima ko pasowalan, ihacowaay a somowal, samaanay kora pakayraan itiya, ato o maanan ko mafekaday a demak i ˈayaw ato ikor.

Haratengen to mamananam ko maanan. Ngaˈayay licayen ko niyah: ‘O maˈoningay i Fangcalay Cudad a tamdaw samaanay ko harateng ato falocoˈ nangra? Paihkalay cangra to maanan a capeling? Maminanam kako to maanan a capeling nangra, ato miliyas to maanan a demakan?’

Sakadademaken ko mananamay. Itini i pitosilan, anca itini kalacafay to tao, sakadademaken ko mananamay iso. Mihaen i, mamatinako iso ko nano sowal ni Yis tada citanengay, sanay cingra: ‘Mafanaˈ kamo tonini a demak i, ano tooren a midemak, o malemedayto.’​​—⁠Yohani 13:⁠17.

• Sapaini a sowal: Mitosilay ato Nikaˈorip Rayray no Saˈopo iraay ko O Odoˈ no Kimad no Kawas sanay a kamok, papadama kitanan minanam to sasamaanen misaka dademak ko mananamay a lalakaw. Onini a kamok marariday ira ko pina salicay ato coka, sinanoten ita konini a lalakaw misongilaˈ a midotim.