Biblia liytʼktan ukhajja, suma yatichäwinak jikjjatañatakejj jukʼamp yatjjatañaw yanaptʼistaspa. Ukampis jiwasar yanaptʼañapatakejj ¿kunsa lursna?

Kuntï liyktan uk jukʼamp sum yatjjatapjjañäni. Akhamwa jisktʼassna: “¿Khitis aka cheq qellqawayi? ¿Kunapachas qellqäna? ¿Khititakis qellqäna? ¿Kunas uka tiempon pasaskäna? ¿Kunas uka nayrasa uka qhepatsa pasäna?” sasa.

Kuntï yateqktan uka toqet lupʼipjjañäni. Aka jisktʼanakar qhanañchañasawa: “Aka qellqatan parlki uka jaqenakajj ¿kunjamas jikjjatasipjjpachäna? ¿Kunjam chuymanïpjjpachänsa? ¿Kunatsa jupanakat yateqasiñaja? ¿Kunanaks jan wal lurapjjäna? ¿Kunatsa ukanak jan lurañajäki?” sasa.

Yateqatasarjam sarnaqapjjañäni. Predikir sarktan jan ukajj yaqha jaqenakamp parlktan ukhaw yateqatasarjam sarnaqañasa. Ukhamatwa Salmo 107:43 textorjam lurañäni, ukan akham siwa: “Khititï yatiñanïki uka jaqejja uka toqenakatwa lupʼini” sasa.

• Akwa lurasma: Semanan apaski uka tantachäwin “Biblian suma yatichäwinakapa” sat cheqaw utji, ukanjja kunjamsa yateqktan ukarjam lursna uk amuyañatakiw yanaptʼistu. Uka cheqanjja, sapa semanaw jiwas pachpatak jisktʼanakasa, lupʼiñatak mä qhawqha arunakasa, amuytʼañasatak fotonakasa jan ukajj dibujonakas utji.