Kɛ á kánngan Biblu’n nun’n, a kwla kunndɛ ndɛ cinnjin nga be o nun’n, be su like. ?Wafa sɛ yɛ a kwla yo sɔ kpa tra laa-ɔ?

Fa ɔ ɲin sie i Biblu’n nun ndɛ’m be ngbɛsungbɛsu’m be su kpa. I wie yɛle kɛ, usa ɔ wun kɛ: ‘?Wan yɛ ɔ klɛli ndɛ’n niɔn? ?Wan yɛ be ­klɛli ndɛ’n mɛnnin i-ɔ? ?Blɛ benin nun yɛ ɔ ­klɛli ndɛ’n niɔn? ?I blɛ su’n, sa benin yɛ ɔ o lɛ-ɔ? ?Sa benin yɛ ɔ juli ka naan w’a klɛ ndɛ’n niɔn? ?Kɛ ɔ klɛli ndɛ’n, sa benin yɛ ɔ juli-ɔ?’

Bu afɔtuɛ nga ndɛ’n man wɔ’n i su akunndan. I lɛ nun’n, a kwla usa ɔ wun kɛ: ‘?Wafa sɛ yɛ sran nga be kan be ndɛ’n be wun yo be-ɔ? ?Nzuɛn benin yɛ be yili i nglo-ɔ? ?Ngue ti yɛ ɔ fata kɛ n nian be nzuɛn’n su, annzɛ ɔ fataman kɛ n nian su-ɔ?’

Nian afɔtuɛ nga ndɛ’n man wɔ’n su. Kɛ á bó jasin fɛ’n, annzɛ a nin ɔ wiengu’m be tranlɛ’n nun’n, nanti like nga a suannin’n su. Sɛ a yo sɔ’n, á klé kɛ ngwlɛlɛ ng’ɔ fin Ɲanmiɛn’n yɛ ɔ sie wɔ-ɔ. Biblu’n se kɛ: “Sran kwlaa ng’ɔ ti ngwlɛlɛfuɛ’n ɔ́ fɛ́ i ɲin síe i sa sɔ’m be su.”​—⁠Jue. 107:⁠43.

• Like kun mɔ a kwla yo’n: E lemɔcuɛ afiɛn’n nun aɲia fluwa’n nun’n, ndɛ akpasua kun o lɛ’n, be flɛ i “Ɲanmiɛn ndɛ’n nun ninnge kpakpa wie mun.” Bu afɔtuɛ nga ndɛ akpasua sɔ’n man wɔ’n i akunndan. Ndɛ akpasua sɔ’n nun’n, e wun kosan wie mɔ e kwla fa usa e wun’n, nin ndɛ wie mɔ e kwla bu su akunndan’n, ɔ nin desɛn annzɛ foto wie mun.