Deghẹ u hoo ne u miẹn emwi ewe ọghe orhiọn vbe u ghaa tie Baibol, u ghi ru ezanzan yan ako eso ne u tie. Sokpan vbua khian ru ne u mieke na gele miẹn ere vbọ?

Gualọ otọ okha ne u tie vbe Baibol sayọ. Vbe igiemwi, u ghi hia ne u rẹn ọmwa nọ gbẹn ako ne u tie, ọmwa na gbẹn ọnrẹn gie kevbe ẹghẹ na ya gbẹn ọnrẹn. De emwi nọ sunu vbe ẹghẹ na ya gbẹn ọnrẹn, de emwi nọ sunu a ke gbẹn ọnrẹn, de emwi nọ vbe sunu vba ghi gbẹn ọnrẹn nẹ?

Hia ne u rẹn emwi ne ako nii ma ruẹ re, gualọ ewanniẹn ọghe avbe inọta na: ‘De vbene emwi ghaa ye emwa na guan kaẹn vbe okha nii? De uyinmwẹ eso ne iran ghaa yin? Vbọzẹ nọ na khẹke ne I ya egbe taa eso, kevbe vbọzẹ nọ ma na khẹke ne I ya egbe taa eso?’

Rhie emwi ne u ruẹ re ye uyinmwẹ. U sẹtin rhie emwi ne u ruẹ re ye uyinmwẹ, vbe u ghaa rre ikporhu ra vbe u ghaa gu emwa ọvbehe mu obọ. U ghaa ru vberriọ te u rhie ẹre ma wẹẹ, u mwẹ ẹwaẹn nọ ke obọ Osanobua rre. Zẹvbe ne Baibol khare: “Ọmwaikọmwa nọ mwẹ ẹwaẹn gha mu avbe emwi na roro.”—Psm 107:43.

• Emwi nọ gha ru iyobọ nuẹn: Hia ne u rẹn vbene avbe ako na sunu yi vbe abọ ọghe iko na do vbe uwu uzọla nọ re, Emwi Ewe Ni Rre Uwu Ẹmwẹ Ọghe Osanobua gha ya sẹtin ru iyobọ ne ima ya rhie emwi ne ima ruẹ ye uyinmwẹ. Vbe abọ na, u gha miẹn ọta eso ne ima gha sẹtin nọ egbe ima re, olika ẹmwẹ eso ne ima gha sẹtin gha mu roro kevbe avbe efoto ne ima gha sẹtin zẹ iro yan.