Ima ikot Bible, imekeme ndinam ndụn̄ọde mban̄a se idude ke itie emi ikotde man ikụt mme n̄kpọuto emi ẹdude do. Edi nso ke idinam man inen̄ede idia ufọn?

Nen̄ede kere nsio nsio n̄kpọ ke mbụk emi okotde. Ke uwụtn̄kpọ, domo ndidiọn̄ọ andikewet, owo emi ẹkewetde ẹnọ, ye ini emi ẹkewetde. N̄kpọ eketie didie ini ẹwetde mbụk oro, nso iketịbe mbemiso ẹwetde, ye ke ẹma ẹkewet ẹma?

Kere se ekemede ndikpep nto mbụk oro. Se idin̄wamde fi edi ndibụp idemfo mme mbụme nte: ‘Eketie mme owo ke mbụk oro didie ke idem? Mmọ ẹkenam n̄kpọ didie? Ntak n̄kpekpebede mmọ, mîdịghe ntak emi n̄kpekpemede idem man ndinam se mmọ ẹkenamde?’

Nanam se ekpepde. Emekeme ndinam oro ini ọkwọrọde ikọ m̀mê ke ini anamde n̄kpọ ye mbon en̄wen. Akpanam ntre, oyokụt ọniọn̄ emi odude ke ikọ Jesus emi: “Edieke mbufo ẹfiọkde mme n̄kpọ emi, mbufo ẹyekop inemesịt edieke ẹnamde mmọ.”​—John 13:17.

• Nam emi ise: Se nte se idude ke Mme Akpan N̄kpọ ke Ikọ Abasi ke mbono esop ufọturua esin̄wamde nnyịn ikeme ndinam se ikpepde. Ikpehe emi esiwak ndinyene mme mbụme emi ikemede ndibụp idem nnyịn, mme n̄kpọ emi ikemede nditie n̄kere, ye mme ndise emi ikemede ndikpep n̄kpọ nto.