Sɛ yɛkenkan Bible a, yebotum ayɛ nhwehwɛmu enya nsɛm bi a no ho hia a obotum aboa hɛn wɔ hɛn asetsena mu. Naaso, sɛ ereyɛ nhwehwɛmu a, ebɛnadze na ɔbɔboa wo ma eenya do mfaso kɛse?

Pɛnsapɛnsa Bible mu asɛm bi a akenkan no mu kɔ ekyir. Sɛ yɛbɛyɛ ho nhwɛdo a, ibotum ahwehwɛ obi a ɔkyerɛɛw dɛm asɛm no, nyia ɔkyerɛwee kɛmaa no, nye aber a ɔkyerɛwee. Afei so, ibotum ebisa woho dɛ, ‘Nna ebɛnadze na ɔrokɔ do, ebɛn asɛm na woesi dada, na ebɛn asɛm na osii wɔ ɔno ekyir?’

Bio so, ibotum ebisa woho nsɛm bi dze adwendwen esuadze a ɔwɔ mu no ho. Ibotum ebisa woho nsɛm bi tse dɛ: ‘Nkorɔfo a mekenkaan hɔnho asɛm no tsee nka dɛn? Ebɛn suban na wɔdaa no edzi? Sɛ wɔdaa suban pa edzi a, ebɛnadze ntsi na ɔsɛ dɛ musuasua? Sɛ nna hɔn suban nnyɛ a, ebɛnadze ntsi na onnyi dɛ musuasua hɔn?’

Afei so, sɛ ɔkɛba dɛ enam asɛnka mu anaa enye afofor ridzi nkitaho a, ɔyɛ a fa dza esua no yɛ edwuma. Sɛ eyɛ dɛm a, nna ereda nyansa a ofi Nyankopɔn hɔ no bi edzi dɛ mbrɛ Bible no ka no. Ɔka dɛ: “Obiara a ɔyɛ onyansafo no ma ɔnhyɛ yinom nsew.”—Ndw. 107:43.

• Nyansahyɛ: Ɔyɛ a, hwɛ dapɛn finimfin nhyiamu ne fa a wɔato dzin Akoradze A Ofi Nyankopɔn N’Asɛm Mu no, na hyɛ mbrɛ osi boa hɛn ma yɛdze hɛn adwen si esuadze a ɔwɔ mu no do no nsew. Dɛm ɔfa no, yɛtaa nya nsɛm bi a yebotum ebisa hɛnho, biribi a yebotum adwendwen ho, nye mfonyin ahorow a yebotum esua biribi efi mu.