Niiamlitaomɔ baanyɛ aye abua wɔ ni wɔná jwetrii yɛ Ŋmalɛ lɛ mli. Shi mɛni baanyɛ aye abua wɔ ni wɔná niiamlitaomɔ ni wɔfeɔ lɛ he sɛɛ waa?

Okɛ ojwɛŋmɔ aya nibii komɛi ni he hiaa ni kɔɔ nɔ ni okaneɔ lɛ he lɛ anɔ. Akɛ nɔkwɛmɔnɔ lɛ, kwɛmɔ akɛ obaana mɔ ni ŋma sane ni okaneɔ lɛ, mɔ ni aŋma ahã, kɛ be ni aŋma lo. Bi ohe akɛ, ‘Te shihilɛ lɛ yɔɔ tɛŋŋ be ni sane nɛɛ tee nɔ? Mɛni ba dani sane ni aŋma nɛɛ tee nɔ? Ni mɛni ba yɛ no sɛɛ?’

Kwɛmɔ akɛ mɛni obaanyɛ okase yɛ mli. Be ni otaoɔ nii amli lɛ, kwɛmɔ akɛ obaana saji tamɔ nɔ ni nyiɛ sɛɛ nɛɛ ahetoo lo: ‘Te mɛi ni awie amɛhe lɛ nu he amɛhã tɛŋŋ? Mɛɛ sui amɛjie lɛ kpo? Kɛ́ sui kpakpai ni lɛ, te mafee tɛŋŋ makase amɛ? Ni kɛ́ sui gbohii ni lɛ, te mafee tɛŋŋ matsi mihe kɛje he?’

Okɛ nɔ ni okase lɛ atsu nii yɛ shiɛmɔ nitsumɔ lɛ mli loo yɛ bɔ ni okɛ mɛi shãraa ohãa lɛ mli. Kɛ́ ofee nakai lɛ, ohiɛ baakã shi, ni nɔ ni Yesu wie lɛ baaba mli yɛ ogbɛfaŋ. Ewie akɛ: “Kɛji nyɛle nibii nɛɛ ni nyɛkɛtsu nii lɛ, nyɛyɛ miishɛɛ.”—Yoh. 13:17.

• Ani ole? Ani oyɔse akɛ otsi teŋ kpee lɛ fã ni ji Nyɔŋmɔ Wiemɔ Lɛ Mli Jwetrii lɛ yeɔ ebuaa wɔ ni wɔnaa bɔ ni wɔbaafee wɔkɛ Biblia mli saji atsu nii yɛ wɔshihilɛ mli? Yɛ fã nɛɛ mli lɛ, wɔnaa sanebimɔi ni wɔbaanyɛ wɔbibii wɔhe, otii ni wɔbaanyɛ wɔjwɛŋ nɔ, kɛ mfonirii ni wɔbaanyɛ wɔkase nii yɛ mli.