Ngkana ti wareware n te Baibara, ti kona ni kakaaei kaubwai n taamnei aika kakawaki ake iai ngkana ti karaoa ara kakaae i aoni koaua aika kakawaki. Ma ti na kangaa ni kakabwaiaaki riki mai iai?

Kananoa riki am ukeuke i aon rongorongo aika n te Baibara. N te katoto, kakaaea bwa antai ae e korea te rongorongo, nakon antai, ao n ningai. Baikara bwaai aika riki, tera ae e riki imwaina ao imwina?

Karekei reireiam n arom ni karaoa am kakaae i aon titiraki aikai: ‘Tera aia namakin naake ko wareki taekaia? Baikara aroaro ake a kaotiotii? Bukin tera bwa I riai ni kakairi n aroaro akanne ke bukin tera ngkai N na aki riai ni karikirakei?’

Maiuakin reireiam ake ko karekei tao n am mwakuri ni minita, ke n reitakim ma aomata riki tabeman. Karaoan aei, ko kaotiota iai te wanawana are mairoun te Atua n aron ae taekinaki n te Baibara ni kangai: “Ane e wanawana ao e na mutiakini baikai.”—TaiAre. 107:43.

• Te bwai n ibuobuoki: Iangoa aroni buokara ni maiuakini baika ti reiakin, ni kanoan te botaki are i nukan te wiki ae Baika Kakawaki Aika Mena n Ana Taeka te Atua. Iai n te mwakoro aei titiraki aika ti kona n titirakinira iai, reirei aika kakawaki aika ti kona n iaiangoi, ao taamnei aika ti kona ni kamatebwai.