Tṍó e gé bugi Kpá Káí, èé láá mòn gbò gyọ́ ea di m be è gbĩ́tẽ́ ló gbò nú e gé bugi. Sõò mósĩ́ deè ní eé láá palàge ié bélè lọl ló é?

Gbĩ́tẽ́ ló gbò nòòtẽ́ ea di mm̀ Kpá Káí. Dì belí nu dòòmà bá, gbĩ́ gè nyimá ló nen ea beè emí nòòtẽ́á, gbò ea beè emí mà, nè tṍó ea beè emí. Dìtõ̀ò beè mèà naavàẹ, éé ní ea beè zẹ́ẹ́ naaá ẽ́, vaá éé ní ea beè kpáá naaá ẽ́?

Bugi togó boo nú eo é láá nó lọl ló nòòtẽ́á tení dú ló gè gbĩ́ ààla gbò bíb ea kọ́ọ̀: ‘A beè tọá ló gbò em gé bugi nòòtẽ́ ea kil vá lóí naa vàẹ? Ba beè labví láb naa vàẹ? Éé ní ea náa vaá m̀ é nó va ẹ́, àbèè kọọ̀ éé ní ea náa vaá ním é nó va ẹ́?’

Tú gbò nú eo nóò siimà tóm tṍó eo gé kọ́ kpẹ̀a àbèè tṍó eo gé zọ dõona gbò naaá nu. Be ò náa vó, ò zógè kọ ò íèè nyìmànù ea aa bá Bàrì, dì belí bé e Kpá Káí kọ́ naa tṍó ea kọ́ọ̀: “Kọ̀láá nen ea nyímá nu é ẹb vaá bii dẽesĩ́ gbò nuí.”​—Ps. 107:43.

• Nú ea é láá nvèè bá nè ni: Nvèè kpíi ló bé e Gbò Gyọ́ Ea Di Mm̀ Moǹ Bel Bàrì ea ólò di mm̀ nònù èèlè nyíè zẹ̀ẹ̀ sè ólò nvèè bá nèi kọ é bugi togó boo bé eé láá tú gbò nú e nóò siimá tóm naa. Nakà kpòí ólò faalá bíb eé láá bĩiná bẹẹ bá, gbò gá eé láá bugi togó boo, nè gbò nu dòòle ló eé láá nó nu lọl ló.