Nọ ma te se oria Ebaibol jọ, joma daoma kiẹ kpahe oware nọ ma se na ziezi re ma wuhrẹ obọdẹ eware jọ nọ e sai fiobọhọ kẹ omai noi ze. Ẹvẹ ma sai ro ru ei?

Who te se iku jọ, kiẹ otọ iku na ziezi re whọ riẹ eware buobu kpahe iku na. Daoma riẹ ohwo nọ o kere ẹme na, ohwo nọ o kere i rie se, gbe oke nọ o ro kere iei. Ẹvẹ eware e jọ oke yena? Eme ọ via taure oware nọ a jọ etẹe ta na o tẹ te via? Kọ, nọ oware nọ o kere kpahe na o via no, ẹvẹ eware e nya uwhremu na?

Daoma riẹ otọ oware nọ etẹe na o bi wuhrẹ owhẹ. Re whọ sai wuhrẹ oware jọ noi ze, kiẹ otọ ẹme na re whọ riẹ iyo enọ wọhọ: ‘Ẹvẹ ahwo nọ a ta kpahe na a rri oware na? Emamọ uruemu vẹ a wo, kọ ẹvẹ mẹ sai ro wo uruemu utiọye na nẹnẹ? Kọ a wo ekpehre uruemu jọ nọ u fo nọ me re wo ho?’

Daoma ru oware nọ who wuhrẹ. Ẹsejọhọ oware nọ who wuhrẹ na o sai fiobọhọ kẹ owhẹ nọ who te kpohọ usi uwoma hayo nọ who te bi lele ahwo ru oware. Who te bi muẹrohotọ re who ru oware nọ who wuhrẹ na, u dhesẹ nọ who wo areghẹ, keme Ebaibol ọ ta nọ: “Ohwo kpobi nọ o wo areghẹ o re muẹrohọ eware nana.”—Ol. 107:43.

• Oware jọ nọ u re fiobọhọ: Who te muẹrohotọ whọ te ruẹ nọ ma be hai fi enọ jọ nọ u fo nọ ma rẹ nọ omamai họ obe nọ ma re ro ru ewuhrẹ udevie-oka mai na. A re fi enọ itieye gbe iwoho, gbe eme jọ nọ a gwọlọ nọ ma roro kpahe didi họ abọ Eware Aghae nọ E Rrọ Ebaibol Na.