Yuusa chichame aujeakur penker nekaatai tusar tishipsar unuimiatratniuitji. Nu tishipsar unuimiatramu kajinmatkij tusar itiurkamniaitiaj?

Aujeajnia nu tishipsar unuimiatrartai. Junasha ya aarmia, urutai aarmia, yana ainis timia, wari nankaamakui ainis timia, nu jeatsain tura urumsha wari nankaamasmia tu animiasminiaitji.

Wari unuimiaj nuisha enentaimsartai. Juni animiasar nekaamniaitji: Jui aentsun aujmatna nusha itiurak nekapiarmia, uruku armia, urukamtai wisha ainis atiniaitiaj, warinia awajirarmia tura wisha urukamtai aitkiasnak turashtiniaitiaj?

Unuimiatramu umikiartai. Yuusa chichame etsereakur turutskesha chikich aentsjai warinkisha najankur unuimiatramu aitkiasrik najanawartai. Nu turakrikia Yuus Kanta 107:43 nui tana aintsan turattaji. Nui tawai: “Yaaksha ju̱na nekáa tura esetas anturak umía nuka Uunt Yusa waitnenkartutairi̱n nekaattawai”.

• Juni turamniaitji: Tuke atsakamutin iruntramunam Yuusa chichame penker nekaawartai tana nui unuimiat wemajnia aitkiasrik iisha unuimiatramniaitji. Nuinkia animiasminiaitiajnia nusha, wari turamniaitiaj nui enentaimsatniusha tura aintsan nakumkamu iisar unuimiatratniusha a wemai.