Alɩwaatʋ ndʋ ɖɩkalɩɣ Bibl yɔ, ye ɖɩñɩnɩɣ tɔm yɔ, ɖɩpɩzɩɣ nɛ ɖɩlɩɩ fezuu taa ñɩm yɔɔ. Ɛlɛ ɛbɛ ɖɩpɩzɩɣ ɖɩla nɛ ɖe-Bibl kalʋʋ wazɩ-ɖʋ nɛ pɩkɩlɩ?

Tazɩ Bibl kɛdɛsɩ taa nɛ pilimi. Ñɩnɩ nɛ ŋna se ama tɔm ndʋ ŋwɛɛ nɛ ŋkalɩɣ yɔ, anɩ ɛma-tʋ nɛ ɛzɩmtaa ɛma-tʋ. Wɛtʋ ndʋ taa ɛɛma-tʋ? Ɛbɛ kaalaba pʋcɔ nɛ ɛmaɣ-tʋ nɛ ɛbɛ labɩ pʋwayɩ?

Maɣzɩ lɔŋ weyi ŋpɩzɩɣ nɛ ŋkpɛlɩkɩ yɔ ɩ-yɔɔ. Pɩsa nɛ ŋla mbʋ lɛ, pɔzɩ ña-tɩ tɔm tʋnɛ: ‘Ɛyaa mba pɔ-tɔm pɔyɔɔdɩ kɛdaɣ ŋga ka-taa yɔ, ɛzɩma pɩlakaɣ-wɛ? Wɛtʋ ndʋ palɩzaa nɛ pawɩlɩ? Ye pɩkɛ wɛtʋ kɩbandʋ, ɛbɛ yɔɔ pɩwɛɛ se mamaɣzɩnɩ-tʋ? Nɛ ye pɩkɛ wɛtʋ kɩdɛkɛdɩtʋ, ɛbɛ yɔɔ pɩtɩpɔzɩ se mamaɣzɩnɩ-tʋ?’

Ðɔ lɔŋ weyi ŋkpɛlɩkaa yɔ ɩ-yɔɔ. Pʋtɔma ŋpɩzɩɣ ŋla mbʋ ñɔ-tɔm susuu taa yaa alɩwaatʋ ndʋ ña nɛ ɛyaa lalaa ɩwɛɣ yɔ. Ye ŋlakɩ mbʋ yɔ, ɛzɩ Bibl yɔɔdʋʋ yɔ ŋwɩlɩɣ se ŋwɛnɩ lɛɣtʋ ndʋ tɩlɩnɩ Ɛsɔ cɔlɔ yɔ, kɩyɔɔdaa se: «Mba payɩ pɔɖɔŋ ɛ-paɣtʋ yɔɔ yɔ, pawɩlɩɣ se pɛwɛnɩ lɛɣtʋ siŋŋ.»—Keɣ. 111:10.

• Lɔŋ tasʋʋ: Yʋsɩ ɛzɩma tɔm ndʋ tɩwɛ kpɩtaʋ hɛkʋ taa kediɣzaɣ hɔɔlʋʋ ŋgʋ kɩtɔŋ se Ñɩm mbʋ pɩwɛ Ɛsɔtɔm taa yɔ tɩsɩɣnɩ-ɖʋ se ɖɩɖɔ lɔŋ weyi ɖɩkpɛlɩkaa yɔ ɩ-yɔɔ yɔ. Ðoŋ ɖoŋ lɛ, paɖʋʋ hɔɔlʋʋ ŋgʋ kɩ-taa tɔm ndʋ ɖɩpɩzɩɣ nɛ ɖɩpɔzɩ ɖa-tɩ yɔ, tɔm ndʋ tɩ-yɔɔ ɖɩpɩzɩɣ nɛ ɖɩmaɣzɩ yɔ nɛ kɩlɛmɩŋ weyi ɩ-taa ɖɩpɩzɩɣ nɛ ɖɩtazɩ yɔ.