Naq naqayaabʼasi li Santil Hu, naru tqataw ebʼ li tertokil pek naq tqatzʼil rix xkomon li naʼlebʼ. Abʼan, kʼaru tqabʼaanu re naq tqataw rusilal li tqatzʼil rix?

Qatawaq xchamal li naʼlebʼ chirix li naqayaabʼasi. Jun eetalil, ani kitzʼiibʼank re, joqʼe kitzʼiibʼamank ut re ani kitzʼiibʼaak? Chanru li xwanjikebʼ? Kʼaru kikʼulmank rubʼelaj ut moqon?

Qakʼoxlaq li naʼlebʼ li xqatzol. Qasikʼaq xsumenkil ebʼ li patzʼom joʼ aʼin: «Chanru xeʼrekʼa ribʼ ebʼ li kristiʼaan li natawmank saʼebʼ li eetalil aʼin? Kʼaru chaabʼil naʼlebʼ xeʼxkʼutbʼesi ut kʼaʼut tinkʼam we rikʼinebʼ? Kʼaru yibʼ aj naʼlebʼ xeʼxkʼutbʼesi ut kʼaʼut tintzʼeqtaana?».

Qayuʼamiq li naʼlebʼ li xqataw. Jun eetalil, naq nokoopuktesink malaj naq nokooʼaatinak rikʼinebʼ li kristiʼaan. Chi joʼkan yooqo xyuʼaminkil li naxye Salmo 107:43: «Li wank xnaʼlebʼ, chixkʼuulahaq saʼ xchʼool chixjunil aʼin».

• Li tatruuq xbʼaanunkil: Kʼe reetal naq li naʼlebʼ «Xchaqʼalil ru li raatin li Yos» re li chʼutam saʼ xyanq li xamaan, naxkʼe xwankil junaq li naʼlebʼ li natenqʼank ut kʼam aawe rikʼin. Rajlal xamaan, saʼ li naʼlebʼ aʼin wank li patzʼom li naru naqakʼoxla, ebʼ li naʼlebʼ li naru naqanaʼlebʼa rix malaj ebʼ li jalam u li naru tqatzʼil rix.