Hatubaabal Bibl, tudy mwa kuhet malongweesh hatukaakaam bwa kumvw myand yidyomw bilengel. Ki i mushind kaay utudy mwa kumanyik bilengel menmen myand yivul?

Tweel mu bondok bwa kumvw mudyobw bumvwiij myand yidyobw balond mu Bibl. Cileejel, anj manyik ufundil verseh aaw, baakadyey ufundil, ni ciisang cifundiley. Byaakady mu shikacil kaay? I myand kaay yilongekel kuuhal? Ni i myand kaay yiiyil kulongek kuunyim?

Langil ha malongweesh mawudy muhet hakwiiyihanguj majooj bu mudy: ‘I mushind kaay waakady baat biin myand yiwudy mubal biiyumvw? I biikadil kaay byaakadyobw naaby? Bwabiny nady ni bwa kwiidikij baat aab hakwiikal ni biikadil eeby, eecy kulek kwiikal naaby?’

Kooyel ku malongweesh mawudy muhet, misang yikwaabw mu mudimw a bukajaady, ni mu kushikat kwiibuh ni baat bakwaabw. Hawuloolong nook, uleeleej meej ma kudy Mawej teng muleeleeb Bibl neey: “Biikal muut ukaam kwiikal ni meej, adimukil [akooyel ku] yiin myand eey.”—Mis. 107:43.

• Mubel: Tal mudy myand yiwudy muhet mu cituh cya cisangil cya mukacy mwa luming cya bihak bya mu Diiy dya Mawej yiitwambulwiish bwa kulangil ha mushind utudy mwa kukooyel ku bitudy balong. Cituh eecy cidyaakal ni majooj matudy mwa kwiiyihanguj, myand yitam yitudy mwa kulangiloh, ni bifwaatul bitudy mwa kukontonon.