Umvwe tubena kutanga Baibolo, kukebakeba bishinka kwakonsha kwitukwasha kutaana bishinka bikwabo byanema. Pano ñanyi bintu byo twakonsha kuba pa kuba’mba tumwenemo byawama?

Funjilapo bikwabo pa mashimikila a mu Baibolo nabiji kuyuka wanembele jishimikila jo mubena kutanga, bo anembejile ne kimye kyo ejinembele. Bintu byajinga byepi, ñanyi bintu byamwekele patanshi kabiji ñanyi bintu byamwekele pa kupitapo moba?

Langulukai pa bintu byo mwakonsha kufunjilako. Iipuzhai ano mepuzho pa kuba’mba muyuke byo mwafunjilako: ‘Bantu bo natanga mu jino jishimikila baumvwinenga byepi ku muchima? Ñanyi byubilo byo bamwesheshe? Mambo ka o nafwainwa kwikela na byubilo byo bajingapo nabyo nangwa o nafwainwa kubula kwikela na byubilo byabo?’

Ingijishai byo mwafunjilako kampe mu mwingilo nangwa byo mwakonsha kuba na bantu bakwenu. Umvwe mwauba bino mukamwesha maana a Lesa byonkatu Baibolo byo aambapo’mba: “Yense uji na maana ukomvwina bino bintu.”​—Sala. 107:43.

• Kya kuba: Langulukai pa bintu biji mu kupwila kwa mukachi ka mulungu mu Bya Buneme Biji mu Mambo a Lesa byo byafwainwa kwitukwasha kuyuka bishinka bikwabo byanema byo twafunjilako. Kino kipungu kikala na mepuzho o twafwainwa kwishikisha atweba bene, bishinka byo twafwainwa kulanguluka langulukapo ne bipikichala byakonsha kwitukwasha kuyuka bishinka bikwabo byanema.