Te ŋ wa pɛ diomndaŋ veeloo o Baabuiyo niŋ, ŋ nɔ miŋ tosa yaasiaa le nyɛm tɔɔmaŋ saalɔŋndo. Kɛ vɛɛ naŋ sɔla yɛ tɔnɔɔ tau o keŋ tosaa niŋ?

Chɔɔlu yaasiaa tosa a bundɔŋ Baabuiyo okɔɔ. Le tamaseliiyo, a yaasiaa le wana poonyiaa bundɛi keŋ ndo, a nɛi yaa okɔɔ o poonyiaa yɛ ndi, nduyɛ teleŋ kuɛɛ o poonyiaa yɛ ndi. A yaasiaa vɛlɛ le sinaa sɔɔŋ wa yɔŋnɔŋndo a teleŋ koŋ ndo, sɔɔŋ yɔŋnuŋ tuupa teleŋ koŋ ndo, vɛlɛ a sɔɔŋ yɔŋnuŋ okoŋ kɔɔli woŋ.

Yiyaŋ a nyɛ ŋ pɛɛku wo okɔɔ sanaa a nyunalaŋ ndaŋ yaasiaa: ‘Vɛɛ wanaa ŋ veelu kaŋ diomndaŋ a nda okɔɔ wa, wa yɛ sinaŋndo? Suliŋnda kuɛɛ nda chɔm yɛ? Le yɛɛ ya nɔ yɛ mi tol suliŋnda ndalaŋ kɔɔli ɔɔ mi fafaŋ ndaŋ nɔɔ?’

Dɔu nyɛ ŋ pɛɛku wo o wali niŋ. A tosa hei o wali pollo niŋ ɔɔ mɛɛ ŋ bii acheleŋnda yɛ. Te a tosa lende pɛ, a cho chɔm maa a nɔ taasi iMɛlɛkayaa. Baabuiyo dimi aa: “Wana o wana nɔ taasioo pɛ, mbɔ maa o loonuŋ a sɔɔŋ muŋ okɔɔ.”—Sam 107:43.

• Suɛi kulle: Yiyaŋndɔ a sɔɔŋ wa o buŋgɛi hei bɛŋgu woŋ okɔɔ. Nyɛm Tɔɔmaŋ o Diom Mɛlɛkaa Niŋ. Mi buŋgɛi hei mala naa le sɔɔŋ naŋ pɛɛku muŋ ndoŋ dɔwɔɔ o wali niŋ nyɛkɛndɛi. Kanifuule, teleŋnda bɔɔbɔɔ mi i nɔ nyunala naŋ nyunaŋ ndaŋ, sɔɔŋ kuluŋ naŋ yiyaŋ choo woŋ, vɛlɛ a tamaseliila naŋ pɛɛku leniŋndaŋ.