ဖဲပဖးလံာ်စီဆှံအခါ ပဃုကွၢ် နီၢ်သးအတၢ်လုၢ်ဒိၣ်ပှ့ၤဒိၣ်တဖၣ် ဒီးဃုအါထီၣ် တၢ်ဂ့ၢ်တၢ်ကျိၤသ့. ဘၣ်ဆၣ် ဒ်သိး ပကန့ၢ်အါထီၣ် အဘျုးအဂီၢ် ပကဘၣ်မၤဒ်လဲၣ်.

ဃုသ့ၣ်ညါအါထီၣ် တၢ်ဂ့ၢ်တၢ်ကျိၤ လၢပဖးအီၤ. အဒိ ပကဘၣ် ဃုသ့ၣ်ညါလၢ မတဂၤကွဲး တၢ်ဂ့ၢ်တခါအံၤလဲၣ်, အကွဲးဝဲလၢ မတဂၤအဂီၢ်လဲၣ် ဒီးအကွဲးဝဲလၢ အခါဖဲလဲၣ်. တၢ်အိၣ်သးအိၣ်ဒ်လဲၣ်, တၢ်ကဲထီၣ်ပာ်စၢၤသးဒ်လဲၣ် ဒီးလၢခံ တၢ်ကဲထီၣ်သးဒ်လဲၣ်.

ဆိကမိၣ်ထံ တၢ်မၤလိလၢ ပကမၤထွဲအီၤ ဒီးဃုသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢ. ‘ပှၤလၢပဖးဘၣ်အဂ့ၢ်န့ၣ် အဝဲသ့ၣ် အတၢ်တူၢ်ဘၣ်အိၣ်ဒ်လဲၣ်. အဝဲသ့ၣ် ပာ်ဖျါထီၣ် တၢ်ဂ့ၤတၢ်ဝါ မနုၤလဲၣ်. ဘၣ်မနုၤအဃိ ပကဘၣ်ကွၢ်လိ အဝဲသ့ၣ် အတၢ်ဂ့ၤတၢ်ဝါလဲၣ်. ဘၣ်မနုၤအဃိ ပတဘၣ်ကွၢ်လိ အတၢ်ပာ်သူၣ်ပာ်သး လၢအတဂ့ၤဘၣ်လဲၣ်.’

မၤထွဲ တၢ်ဂ့ၢ်လၢ ပမၤလိဘၣ် ဖဲပဟးစံၣ်တဲၤတဲလီၤတၢ် မ့တမ့ၢ် ပရ့ဒီးပှၤဂၤအခါ. ပမ့ၢ်မၤဒ်အံၤန့ၣ် ပပာ်ဖျါထီၣ်လၢ ပအိၣ်ဒီးတၢ်ကူၣ်သ့. ဒီးပမၤထွဲဒ်သိး လံာ်စီဆှံ တဲဝဲလၢ “ပှၤလၢအမၤထွဲ ကစၢ်ယွၤ အတၢ်ဘျၢတဖၣ်န့ၣ် ပာ်ဖျါထီၣ်လၢ အဝဲသ့ၣ်အိၣ်ဒီး တၢ်နၢ်ပၢၢ်လီၤတံၢ်လီၤဆဲး.”—စံး ၁၁၁:၁၀.

• တၢ်ဟ့ၣ်ကူၣ်– တၢ်အိၣ်ဖှိၣ်လၢ နွံဖးဖီအဂီၢ် အတၢ်ရဲၣ်တၢ်ကျဲၤ လၢအမ့ၢ် တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤန့ၣ် မၤစၢၤပှၤဒ်သိး ပကဆိကမိၣ်ထံ တၢ်မၤလိလၢ ပကမၤထွဲအီၤအဂီၢ်. တၢ်ရဲၣ်တၢ်ကျဲၤတကူာ်အံၤ အပၣ်ဃုာ်ဒီး တၢ်သံကွၢ်လၢ ပကဘၣ် သံကွၢ်လီၤပသး, တၢ်ဂ့ၢ်လၢ ပကဆိကမိၣ်ထံအီၤ ဒီးတၢ်ဂီၤလၢ ပကကွၢ်ထံဆိကမိၣ်အီၤ.