Nanti tukubelenga Ibayibolo tungagha ifundo izyakwavwa nanti tukufufuza. Loli ka tungapindula buli-buli?

Tufufuzaghe nu kuzyivwisya ifundo zyo zili mu Bayibolo. Umwakufwanikizya, mumanye yo akasimba inkani yo mukubelenga, bo akabasimbila na ko akasimbila. Nkimba ivintu vikaba buli-buli pa kabalilo ko akasimbagha, choni cho chikabombiwa bo atasimbite, sona choni cho chikabombiwa akati asimba?

Mwinong’onele vyo mukumanyilako ku nkani yo mukubelenga umwakwilalusya amalalusyo ngati agha: ‘Ka abantu aba munkani iyi bakiyivwanga buli-buli? Nkimba bakalangizyanga nkalo buli? Choni cho nkulondiwa pamo ntakulondiwa ukukonka inkalo zyabo?

Mubombezyanje vyo mukumanyila po muli mu bulumbilili, pamo pa bumi bwinyu ubwi siku ni siku. Nanti mukubomba bunubu, mungaba na mahala ngati mo Ibayibolo likunenela ukuti: ‘Aliwesi yo ali na mahala akuvisungilila ivintu ivi.’—Sali. 107.43.

• Vyo vingatwavwa: Ennya mo inkani zyo zikwaghiwa mundondomeko iya nkomano izya mukasi mwasabata, pachigaba ichakuti Amazyu gha Chala Bukabi mo zikututulila nu kwennya mo tungazibombezezya imbombo. Ichigaba ichi chili na malalusyo gho tungilalusya, ifundo zyo tunginong’onelapo sona ivituzi vyo tungamanyilako.