Potutanga Bible, tubwanya kukimba byabulēme bya ku mushipiditu na kulonga bukimbi. Ino le i muswelo’ka otubwanya kumwena’mo ne pa mfulo?

Kola bininge kanda ne kanda kadi mu nsekununi. Kimfwa, kimba kuyuka mwine wālembele myanda’ya, bene baālembēle’yo, ne kitatyi kyaālembele’yo. Le wēilembele mu ngikadilo’ka, i bika byālongekele kumeso kwa aye kwiilemba, ne i bika byālongekele paāpwile kwiilemba?

Langulukila pa ñeni yobwanya kuboila’ko na kukimba malondololo ku bipangujo pamo bwa bino: ‘Le bantu bālembēlwe’yo bēivwene namani? Le i ngikadila’ka yobāmwekeje? Mwanda waka mfwaninwe kwiula ino ngikadila nansha kuleka kwiiula?’

Ingidija ñeni yoboila’ko, padi mu mwingilo wa busapudi nansha mu kipwano kyobe na bantu bakwabo. Shi ulonge namino, ukekala wa tunangu, monka munenena’kyo Bible amba: “Yewa ense wa tunangu ukalama bino bintu.”—Ñim. 107:43.

• Manwa: Tala myanda idi ku kupwila kwa mu bukata bwa yenga mu kipindi Byabulēme bya mu Kinenwa kya Leza moitukwashisha tulangulukile pa muswelo otubwanya kwiingidija. Divule mu kino kipindi mwikalanga bipangujo byotubwanya kwiipangula, myanda yotubwanya kulangulukila’po, ne bifwatulo byotubwanya kubandaula na katentekeji.