Ñe jej riiti Baibõl̦ eo, jemaroñ pukoti katak ko raorõk ikijjeen ad kõm̦m̦an etale ko. Bõtab ewi wãween bwe en maroñ l̦apl̦o̦k ad bõk tokjãn jãn ad ãindein?

Kam̦wilal̦l̦o̦k am̦ mel̦el̦e kõn bwebwenato ko ilo Baibõl̦. Ñan waanjoñak, lukkuun lale wõn eo ear je naan ko kwõj riiti, ear je ñan wõn, im ñããt eo ear je. Ta wãween ko rar wal̦o̦k ilo kar tõre in, ta ko rar wal̦o̦k m̦oktal̦o̦k jãn tõre in, im ta ko rar wal̦o̦k ãlikin men ko kwõj riiti?

Lukkuun l̦õmn̦ak kõn men ko kwõmaroñ katak jãn men eo kwõj riiti ikijjeen am̦ etali kajjitõk ko ãinwõt: ‘Ewi wãween an armej ro eñjake? Kadkad ta ko rar kwal̦o̦ki? Etke ij aikuj anõke kadkad ko rar kwal̦o̦ki ak kõjparok bwe in jab ejaaki?’

Jerbali men ko kwõj katak kaki, bõlen ilo jerbalin kwal̦o̦k naan ak ilo wãween am̦ kõm̦m̦an ñan ro jet. Ilo am̦ kõm̦m̦ane men in, kwõj kwal̦o̦k mãlõtlõt eo jãn Anij, ãinwõt an Baibõl̦ ba: “Jabdewõt eo emãlõtlõt enaaj lale men kein.”—Sam 107:43.

• Juon men emaroñ jipañ: Lale wãween an mel̦el̦e ko ilo Katak ko Raorõk jãn Naanin Anij me jej etale ilo kweilo̦k eo ilo lukwõl̦pãn wiik, maroñ jipañ kõj ñan lo boin ko jemaroñ jerbali. Ekkã an m̦õttan in kwal̦o̦k kajjitõk ko jemaroñ kajjitõk ippãd make kaki, boin ko jemaroñ kõl̦mãnl̦o̦kjen̦ kaki, im waanjoñak ko jemaroñ etali.