Uelis tikajsiskej okseki tamachtilis keman tikixtajtoltiskej Biblia komo tiktemouaj itech toamaixuan. Sayoj ke, ¿toni uelis tikchiuaskej para maj techpaleui tamachtilis tein tikajsij?

Maj okachi timomachtikan tein tikixtajtoltiaj itech Biblia. Xa uelis tikitaskej akoni kijkuiloj, kemanian kijkuiloj uan akonimej kinijkuilouilijkej. Toni panotoya keman kijkuilojkej uan toni panok achto uan satepan.

Maj itech titanemilikan toni techmachtia. Maj tiktemokan keniuj tiknankiliskej nejin netajtanilmej: “¿Keniuj momachilijkej akin ininka motajtoua itech nejin texto? ¿Toni taman tein kualtsin kinextijkej uan keyej moneki no ijkon nikchiuas? ¿Toni amo kuali kichiujkej uan keyej amo moneki ijkon nikchiuas?”.

Maj tikchiuakan tein timomachtiaj. Nejin uelis tikchiuaskej keman titanojnotsatiuij oso keman titajtoskej iniuan oksekin. Ijkon tikchiuaskej tein kijtoua Salmo 107:43: “Akin tamatkej kielnamikis nejin”.

• Tein uelis tikonchiuas: Itech “Tamachtilis tein kipia Biblia” tein timomachtiaj itech nechikol itajkotian semana techpaleuia maj tikchiuakan tein timomachtiaj, xikonita keniuj tejuatsin no uelis ijkon tionmomachtis. Nejin tamachtilis nochipa kiualkui netajtanilmej tein uelis timomachtiskej, seki taman tein uelis itech titanemiliskej uan taixkopimej tein uelis techmachtiskej.