Ngati tuŵelenga Baibo, tufunika kusakila cuma cauzimu mwa kufufuza. Koma kansi tingapindule tyani mokwanila?

Mukofufuza zinyinji pa nkhani yamuŵelenga m’Baibo. Mwacisanzo, mukofufuza kuti muziŵe elemba nkhani yamene iyo, elembela ŵani ndipo eilemba lini. Kansi zinthu zenze tyani peenzolemba? N’cinji cecitika kuvuli koma soti pavuli pake?

Ganizilani zamungaphunzilepo mwa kufufuza makonsho monga akuti: ‘Kansi ŵanthu ŵamuŵelenga ecimvwa tyani? Kansi eonesha minkhalidwe yotyani? Kansi ni minkhalidwe yotyani yanufunika kutolela olo kupewa?’

Mukoseŵenzesha zinthu zamwaphunzilapo, kaya ni mu utumiki olo pocita zinthu na ŵanthu ayakine. Mwa kucita izi, muoneshe nzelu yaumulungu monga ni mwayufotokozela Baibo, kuti: “Wanzelu ni ŵani? Yove oona izi.”—Sal. 107:43.

• Mfundo: Ganizilani mwamene nkhani zupezeka m’misonkhano ya mkati mwa wiki, makamaka pa mbali yakuti Cuma Cupezeka m’Mau a Mulungu zutiyavyila kuona mwatingaziseŵenzeshele. Kanyinji-kanyinji, mbali iyi yukonda kunkhala na makonsho yatingazikonshe, mfundo zatingasinkhesinkhe na zatingaphunzilepo pa vithunzithunzi.