Tikoŵelenga Baibolo tingafwane chuma chauzimu kupitila mukufufuza. Kansi tingachite tyani kuti tikopindula ngako keno tufufuza nkhani iyakine?

Mukofufuza kuti muphunzile vinyinji mu nkhani ziyakine za m’Baibolo. Mwachisanzo, mungalikonshe kuti: ‘Kansi niŵani elemba nkhani yamene iyi? Kansi elembela ŵani? Kansi nkhani yamene iyi ilembewa nthawe yanji? Kansi vinthu venze tyani pa nthawe yamene iyo? Kansi n’vinthu votyani venzechitika nkhani yamene iyi ikaliyelembewa? Kansi n’vinthu votyani vechitika pavuli pake?’

Ganizilani maphunzilo ŵamungaphunzilepo mwakulikonsha makonsho monga akuti: ‘Kansi ŵanthu otomolewa mu nkhani yamene iyi enzekumvwa tyani? Kansi ni minkhalidwe yotyani yenze nayo? Ndaŵa yanji nufunika kukonkheja olo kupewa kukulisha minkhalidwe yechiwonesha ŵanthu amene aŵo?’

Mukokatishila ntchito maphunzilo amwatolapo pamukata ntchito yolalikila, olo pamuchita vinthu na ayanu nsiku na nsiku. Mukachita tetyo, mwewo muzawoneshe kuti nimwe munthu wanzelu molingana na mwakunenela Mawu a Mulungu kuti: “Aliyense wanzelu awone vinthu vamene ivi.”—Sal. 107:43.

• Vofunika kuganizila: Wonani mwamene nkhani zatufwana mu Chuma chupezeka m’Mawu a Mulungu pamisonkhano ya nkati mwasondo mwazutiyavyila kuwona mwatingakatishile ntchito mfundo za m’Baibolo pamoyo wasu. Mbali yamene iyi yukonda kunkhala na makonsho amene ŵatingalikonshe, mfundo zatingafunike kuziganizila, komasoti vithunzi vamene vatingafufuze pophunzila.