Ge re bala Beibele re ka nyaka matlotlo ka go dira nyakišišo. Go dira bjalo go tlo re hola bjang?

Bala Beibele ka mo go tseneletšego. Ka mohlala, ipotšiše gore ke mang a ngwadilego karolo yeo ya Beibele, o e ngwaletše bomang le gore e ngwadilwe neng. E ngwadilwe ka tlase ga maemo afe, go diregile’ng pele, le gona go diregile’ng ka morago?

Naganišiša ka seo o ithutago sona ka go dira nyakišišo le go ipotšiša dipotšišo tše di swanago le gore: ‘Batho bao go bolelwago ka bona ba be ba ikwa bjang? Ke dika dife tšeo ba bego ba na le tšona? Ke ka baka la’ng ke swanetše go ekiša dika tšeo goba go phema go ba le tšona?’

Diriša dilo tšeo o ithutilego tšona, mohlomongwe ge o le tšhemong goba ge o dirišana le batho ba bangwe. Ge o dira bjalo o tla be o bontšha bohlale bja Modimo, go etša ge Beibele e bolela, e re: “Motho yo bohlale o tla bona dilo tše.”—Ps. 107:43.

• Keletšo: Bona kamoo dilo tšeo re di hwetšago karolong ya Matlotlo a ka Beibeleng dibokeng tša gare ga beke, di ka re thušago ka gona go diriša seo re ithutago sona. Gantšhi karolo ye e na le dipotšišo tšeo re ka ipotšišago tšona, dintlha tšeo re ka naganišišago ka tšona le mehlala yeo re ka e hlahlobago.