Qullaawa Maxaafa nabbambeemmo woyite, ayyaanaamittete jiro afiˈrate xiinxalla dandiineemmo. Ikkina woˈmunni woˈma horo afiˈra dandiineemmohu hiittoonniiti?

Qullaawu Maxaafi xagge unte xiinxalli. Lawishshaho xagge borreessinohu ayetiro hattono ayera woy mamoote borreessinoonniro afate woˈnaali. Hakka woyite ikkino coyi maati? Hakkuyira albaanni woy hakkuyi gedensaanni mayi ikkino?

Aante noo xaˈmuwa daafira xiinxallite maa rosattoro hedate woˈnaali: ‘Xaggete giddo kulloonni mannira mayi macciishshaminonsa? Insara hiikkuri akatta noonsa? Ani kuri akatta lossiˈra woy hooˈla hasiissannoehu mayiraati?’

Rosoottore loosu aana hosiisi; soqqanshonniwa woy wolu manni ledo heeˈratto woyite hatto assa dandaatto. Hatto assattoha ikkiro Qullaawu Maxaafi kulannonte gede Maganu aanno hayyo nooheta leellishatto; Qullaawu Maxaafi, “Egennaammu [hayyootu] baalu konne coye huwatto” yaanno.—Far. 107:43.

• Kaaˈlitanno hedo: Kiristaanu Heeshshonna Soqqansho Gambooshshi yannara shiqqannoti Maganu Qaali Giddo Noota Muxxe Jiro yitanno kifilera noo borro ronsoommore loosu aana hosiisate kaaˈlitannonke gara hedate woˈnaali. Konni gafira duucha woyite ninkeneeto xaˈmineemmo xaˈmuwa, hiincineemmo hedo hattono seekkine hendeemmo lawishshuwa heedhanno.