Te wi e leisi Bijbel, wi kan ondrosuku sani moro fini fu feni moi leri. Ma fa wi kan kisi moro wini fu den sani di wi e studeri?

Ondrosuku den tori na ini Bijbel moro fini. Fu eksempre, kon sabi suma skrifi a Bijbel buku, gi suma a skrifi èn o ten a skrifi. San ben de a situwâsi di a buku skrifi, san ben psa fosi a ten dati èn san psa baka dati?

Prakseri san yu kan leri fu a tori. Yu kan leri moro fu a tori te yu e aksi yusrefi: ’Fa den sma na ini a tori ben e firi? Sortu fasi den ben abi? Fu san ede mi musu sori den srefi fasi fu den, noso fu san ede mi no musu kon abi den fasi dati?’

Fiti den sani di yu leri. Kande yu kan fiti den sani di yu e leri na ini a preikiwroko noso te yu de nanga tra sma. Na so yu o sori taki yu koni, fu di Bijbel e taki: „Suma koni trutru? We, na a sma dati o si den sani disi.”​—Ps. 107:43.

• Wan sani di yu kan du: Luku fa den sani di wi e leri na a pisi fu a mindriwiki konmakandra di nen Gudu na ini Gado Wortu e yepi wi fu prakseri fa wi kan fiti den sani dati. Nofo tron a pisi disi abi aksi di wi kan poti gi wisrefi, penti di wi kan denki dipi fu den, nanga prenki di wi kan luku.