Ciindi notubala Bbaibbele, tulakonzya kujana mbono zyakumuuya kwiinda mukuvwuntauzya. Pele mbuti mbotukonzya kugwasyigwa kapati?

Amwiiye zinji kujatikizya twaambo toonse tuli muzibalo zyamu Bbaibbele. Mucikozyanyo, amumuzyibe muntu iwakalemba cibalo eeco, mbaakali kulembela alimwi aciindi naakacilemba. Amuzyibe kujatikizya bukkale mbobwakabede, icakacitika katanacilemba alimwi acakacitika naakamana kucilemba.

Amuzinzibale kuyeeya ziiyo nzyomukonzya kwiiya kwiinda mukuvwuntauzya mibuzyo mbuli yakuti: ‘Ino bantu ibakajatikizyidwe bakalimvwa buti? Ino mbube nzi mbobakatondezya? Nkaambo nzi ncondeelede kubwiiya bube oobu naa kubutantamuka?’

Amuzibelesye ziiyo nzyomwaiya, ambweni mumulimo wanu wakukambauka naa mbomubeendelezya bamwi. Kwiinda mukucita boobu, muyootondezya kuti muli basongo kweelana ambolyaamba Bbaibbele kuti: “Kufwumbwa muntu musongo uyoozibikkila maano zintu eezyi.”—Int. 107:43.

• Nzila Iigwasya: Amubone makani aajanika mucibeela cakuti Mbono Izili mu Jwi lya Leza cicitwa lyamuswaangano wamukati kansondo mbwaatugwasya kuzinzibala kuyeeya mbotukonzya kuzibelesya nzyotwiiya. Cibeela eeci lyoonse inga cilijisi mibuzyo njotukonzya kulibuzya, twaambo ntotukonzya kuzinzibala kuyeeya alimwi azifwanikiso nzyotukonzya kulanga-langa.