Te kʼalal ya jkʼopontik te Biblia, jun te bitʼil ya xjuʼ ya jletik te bintik mukʼ skʼoplal jaʼ te ya jpastik investigar. Pero, ¿bin ya xjuʼ ya jpastik yuʼun ay bin lek ya xlokʼ kuʼuntik-a te bitʼil ya jpastik investigar?

Kilbeytik ta lek skʼoplal te bin ya jkʼopontike. Jich bitʼil, ¿machʼa la stsʼibay te versículo ini, bin-ora la stsʼibay sok machʼa ta stojol la stsʼibay? ¿Bin yak ta kʼoel ta pasel-a? ¿Bin kʼot ta pasel ta nail sok ta patil?

Kiltik te bin ya yakʼ jnoptik. Jlebeytik sujtib te jojkʼoyeletik jich bitʼil ini: «¿Binwan yaʼiyel la yaʼiy sbaik te machʼatik ya xchiknaj sbiilik ta versículo-abi? ¿Bintik talelil la yakʼik ta ilel sok bin yuʼun ya skʼan ya jkʼayinbey te stalelike? ¿Bintik lokʼ yuʼunik-a sok bin yuʼun te ma jichuk ya skʼan jpas?».

Jpastik ta jkuxlejaltik. Jich bitʼil, ya xlokʼotik ta scholel skʼop Dios sok te kʼalal ya xkʼopojotik sok te ants winiketik. Teme jich ya jpastike yakotik ta spasel te bin ya yal te Salmo 107:43: «Te machʼa ay spʼijil yoʼtan, acʼa yacʼ ta yoʼtan ini».

• Te bin ya xjuʼ ya apas :Ilawil te banti ya yal «Kʼulejalil te ay ta Biblia», te ya yichʼ kʼasesel ta tsoblej ta olil semana jaʼ ya yalbey skʼoplal te bin-utʼil ya jpas ta jkuxlejaltik te bin ya jnoptik, jichuk ya akʼaytes aba ta spasel ta jujun semana, ta sección ini yichʼoj jojkʼoyeletik te ya xjuʼ ya jpasbey jbatik, nojpteseletik te ya xjuʼ ya jnopilan ta koʼtantik sok dibujoetik te ay bin ya yakʼ jnoptik.